Jinghpaw Wunpawng mungchying sha langai hku nna Jinghpaw Wunpawng Amyusha Hpung (Kachin National Organisation- KNO) hta shang lawm ra ai lam

1. KNO gaw Jinghpaw Wunpawng mung dan kata e nga ai lak nak lang, shang lawt u hpung ni Myen asuya hte gap hkat jahkring ai lam la ngut ai hpang, amyu sha lawt lu lam mung masa shamu shamawt ai lam ni hta, ra rawng ai lam ni hta shang lawm madi shadaw lawm ra sai hpe tau mu nna hpaw ninghtang da ai mung masa u hpung re.

2. KNO gaw a myu sha ni lawt lu lam, amyusha ni lu ra ai ahkaw ahkang a matu ten mang ai lam hta gasat, shakut shaja nga ai gadai uhpung uhpawng shing nrai gadai jan/wa hpe mung, amyu sha lawt lu lam hta tup hkrak madi shadaw let lata gindun matut mahkai magam bungli jawm gunhpai nga ai u hpung re.

3. KNO gaw Amyu sha lawt lu lam a matu n’gup aga hte tsun n lu yang, n’gun lagaw hte mung gasat ning hkap shakut shaja ra ai ngu ai ladat hpe hkap la kam sham ai hte maren, mung masa pinra hta mung shang tsap, lak nak hte ning hkap gasat ai lam hta mung n gun shadat nga ai u hpung langai re. Dai gaw byin wa na mayak manghkang hpe ala nga ai hku n re sha, ahkyak yang hkrak rai na matu ya kaw na hkyen lajan hpang wa ai lam ni re.

4. Moi shawng de gaw amyu sha mung shang hkrun lam magam ni hta Representative Office of Kachin Affairs (ROKA) kaw nna anhte amyusha ni a mayak ni hpe maigan shiga dap ni de htawn shalai ya nga sai, kaga amyusha uhpung, daphpawm ni (NDF) ni hte matut mahkai bungli jawm galaw ai hta lit la lai wa sai. Raitim, ya yang na sat lawat gaw, kaga gaphkat nga ai lak nak lang uhpung ni hte, Myen hpyen asuya hpe ning hkap ai Democracy mung masa u hpung ni hte matut mahkai n manu ai hte, Jinghpaw Wunpawng amyu sha ni a mayak manghkang lam ni hpe maigan mungdan, mungkan mung masa pinra hta myusha yawng a malai htawn shalai ya ai lam n’nga ai daram rai mat nga ai. Dai majaw, a myu sha gawng malai tai ya let mungkan mung masa pinra hta myusha ni ra sharawng ai lam, mayak manghkang ni hpe htawn shalai ya na u hpung langai ra ai hte maren, dai magam yi ngam hpe KNO hku nna lit la gunhpai sa wa ai lam rai nga ai. Bai Myen hpyen asuya hpe ning hkap nga ai Democracy mung masa u hpung ni, lak nak lang gasat nga ai u hpung ni, amyu sha baw sang hpung ni hte lata gindun matut mahkai let amyu sha lawt lu lam hta matut manoi magm gunhpai nga ai u hpung mung rai nga ai.

5. KNO a woi awn ningbaw ni gaw myu tsaw myit hpring tsup let, shanglawt asuya (KIO/KIA) hpe grai tsawra ai, shang lawt asuya a rawt malan hkrung lam hta hpaji, sut gan ja gumhpraw, aten law law jaw nna madi shadaw shakut sa wa ai, tengman kaja ai ninggawn mung masa lam yan (policy) ni hpe ja ja manoi manat nga ai ningbaw ni rai nga ai.

6. KNO gaw anhte amyusha ni lu ra ai ahkaw ahkang n lu ding sang prat ban hte ban Myen hpyen asuya hpe matut gasat sa mat wa lu na matu nli jahkrat let, amyusha lawt lu hkra shakut sa wa na u hpung rai nga ai.

Nang-ngai gara hku KNO kaw shang lawm mai ai.
Amyusha yawng a lawt lu lam re majaw Jinghpaw Wunpawng mung chying sha kaji kaba yawng shang lawm ra ai. Dai gaw tinang amyu sha, tinang ding hku hte tinang a matu arang bang ai lam re.

1. KNO hpung shang malawm hku shang lawm mai ai. Hpung shang manu jahpu n bang ra ai.

2. Hpung shang mying jahpang hpe tinang ra ai shing teng amying hku seng ang ai KNO rung ni hte bawng ban nna mai bang ai. Dai gaw shimlam tsang ra ai hpu nau ni a matu re.

3. KNO a amyu sha lawt lu lam shakut shaja ai hta aten tup, shing n rai aten daw chyen hku ap nawng shang lawm mai ai.

4. Lak nak lang magam gun hpyen la hku ap nawng mai ai.

5. Mung masa myit sharawng awn ai jan/wa mung masa lam hta hpaji jaw, a ten jaw, bawng ban jahkrum lawm let mung masa magam lit hta woi awn shanglawm gunhpai mai ai.

6. Bawng ring lam myit lawm ai jan/wa, amyu sha rawt jat galu kaba lam hta hpaji jaw, a ten jaw, bawng ban jahkrum lawm let amyu sha bawng ring gan ga wa na magam lit hta woi awn shang lawm mai ai.

7. Aten n lu jaw tim, n law htum ja gumhpraw hku atsam dat shang lawm mai ai.

Jinghpaw Wunpawng Amyusha Hpung shiga dap
KNO News and Information Department

KNO ningbaw ni a labau kadun:

1. KNO Amu Madu, Zinghang Brang Seng gaw USA mung dan hta shawng ningnan du ai Jinghpaw Wunpawng myusha rai nna, maigan du amyu sha ni hpe hpu shawng hpu ba tai ya let lam shagu hta karum shing tau ya nga ai myu tsaw ningbaw re. Dai hta n’ga amyusha lawt lu lam shagu hta hpaji jaw, madi shadaw karum shing tau ya nga ai myutsaw ningbaw rai nga ai.

2. KNO Tingnyang Up, Duwa Howa Ja La gaw shi a manu dan la ai ram prat ten hpe jaw let Shanglawt ningbaw ningla ni hpe hpaji jaw, garum shing tau lai wa sai. Ningbaw Kaba GOC Lahtaw Zau Seng a prat kaw nna, Ningbaw Kaba Zau Mai a prat du hkra Maigan salang ni hpe matut mahkai ai lam ni hta grai shakut shaja, amyusha ni a matu tsun shaga lai wa sai amyu tsaw ningbaw rai nga ai.

3. KNO Amu Gun Ningbaw, Salang Bawmwang La Raw gaw kaji ten kaw nna amyusha lam hta grai myit mang ai wa rai nna myutsaw myit hpring tsup ai wa re. Karai Kasang, lamu ga madu hpan Karai e anhte amyusha ni hta na, law htam ai Sutgan hpe shaman ya ai hpang, shi hte ni ai, tsan ai jinghku jingyu ni hpe karum shingtau ya ai sha n’ga, Shanglawt magam lam ni hta mung Ningbaw Kaba Brang Seng a prat kaw nna, shi a aten hpe jaw let Shanglawt Ningbaw Kaba ni hte Mung Shang hkrunlam, KIA hpyendap hta ra nga ai singnat laknak mari mahkawng ai lam hte kaga lam ni law law hta madi shadaw shakut shaja nga ai amyu tsaw ningbaw rai nga ai.

4. KNO Maigan Matut Mahkai Lithkam, Dr. Lahtaw Naw Lawn gaw anhte Jinghpaw Wunpawng Mungdan hta shangai wa ai myutsaw share shagan re hte maren, Duwa Howa Ja La hte maren sha, KIO ningbaw GOC Dukaba Lahtaw Zau Seng, Ningbaw kaba Marang Brang Seng ni hpe karum shingtau, shanglawt mungshang hkrun lam, amyu sha magam lam ni hta grai shakut ai amyutsaw myit hpring tsup ai ningbaw langai re.

5. KNO Ningtau Amu Madu, Dr. Zau Htung gaw anhte amyu sha ni hta na shawng nna tsi hpaji hkaja la lu sai tsi du langai re. Myutsaw myit hpring tsup ai hte shi chye chang ai tsi hpaji hte anhte amyusha ni hpe grai hkye lai wa sai. Asak aprat kaba wa ai hpang maigan ga de du ai raitim, shi dang di lu ai made amyusha lam hta shakut lawm nga ai, myutsaw myit hpring tsup ai tsi du kaba langai re.

6. KNO Ningtau Maigan Matut Mahkai, (Tara Kasa) Mahkaw Hkun Sa gaw mung shawa a lu ra ai ahkaw ahkang maga de tsap nna shaga ai, hkam la ai a majaw Myen ni rim nna 10 ning jan bawng dung hkrum lai wa sai. 2001 ning hta Thai mungdan de le wa nna, Kachin State National Congress for Democracy (KNCD Librated area) party a nigbaw mung rai nga ai. KCDC (Kachin State Constitution Drafting Committee) a ningbaw lithkam mung rai nna, jet ai Myen mung federal union tara kanu a bawng ban salang langai mi mung rai nga ai.