JINGHPAW WUNPAWNG AMYUSHA KONGSI NINGBAW KABA KAW NNA, MUNGSHAWA, DAP SHAWA YAWNG HPANG DE, N DAU SHABRA DAT AI, 2006 NING NA 45 NING HPRING, 46 LANG NA RAWT MALAN MUNG GA.

N'htoi: 5/2/2006.

Dai ni gaw, anhte Jinghpaw Wunpawng amyu sha ni, tinang mungdan san san lu la na matu, KIO, ngu ai, mung masa hpung, KIA ngu ai, shanglawt hpyen dap hpe hpaw shabawn hpang wa ai laklai ai n'htoi kaja rai nga ai. Ndai zawn anhte amyu sha ni tinang mungdan lu la na matu rawt malan wa ai gaw, dai ni rai yang, 45 ning hpring sai. Rai nna, 46 lang na rawt malan n htoi kaja rai nga sai. Ndai zawn, mali kaja n htoi aten hta` ya na zawn, nanhte myutsaw mungtsaw hpyen du, hpyen gyi, hpyen la ni yawng hte mung shawa ni yawng a man e mungga htawn na matu ahkang lu ai majaw, anhte kamsham nga ai hpan karai wa hpe chyeju dum shakawn n ngai.

Tsawra ai, myutsaw hpyen la ni, mungchying mungshawa masha ni, dai ni gaw, anhte amyu bawsang ni tinang a mungdan lu na matu, rawt malan hpang wa ai, 45 ning hpring nna, 46 lang rawt malan shani rai sai. Ndai ten hta` anhte amyu sha ni, moi chyaloi n hkoi prat kaw nna, ya yang aten du hkra nga pra sa wa ai lam hpe, kadun dawk tsun dan mayu ai. Ndai zawn tsun mayu ai lam gaw, asak kung sai ni gaw, yawng chye ai rai tim, asak naw` kaji ai ni gaw atsawm n chye na re. Dai majaw, ndai lam hpe yawng chye na matu tsun dan ai lam re.

Anhte amyu sha ni a labau hpe yu dat ai shaloi, 1.Ginru grinsa la ni a prat, 2. Gumchying gumsa prat, 3.English mung maden hpe ninghkap gasat ai prat, 4. English amyu ni up hkang hkrum ai prat, 5. Japan majan prat (mungkan majan no 2 ten) 6. Myen mung hte shanglawt rau jawm la nna nga ai paliman prat, 7.Du Kaba Naw Seng woi awn ai rawt malan lam, 8. KIO, KIA hpaw nna, shanglawt rawt malan wa ai hkrun lam, 9.Ya yang byin nga sai, mungmasa hpe hkan nna, anhte amyu sha ni a ahkaw ahkang hte tinang mungdan hpe gara hku rau jawm hkye la na ngu ai ten, ngu nna, san san ga garan, maram yu mu nga sai.

Anhte amyu bawsang ni gaw, lai mat sai shaning law law kaw nna, ya anhte shanu nga ai lamu ga kaw,ginru ginsa prat hta, ginru ginsa la ni a woi awn ai lam hpe hkan nna, nga lai wa sai. Gumchying gumsa prat hta mung,gumchying gumsa DU MAGAM ni woi awn ai masa lam yan kata kaw prat hte prat nga lai wa sai.Tinang amyu hte tinang lamu ga hpe tinang amyu MUNGDU ni up hkang nna nga lai wa sai.

ENGLISH MUNG MADEN HPE NINGHKAP GASAT AI PRAT.
Anhte Jinghpaw Wunpawng amyusha ni gaw,tinang mungga hpe tinang up hkang sha nna, nga ai ten hta, 1850 ning a hpang daw de,Myen amyu sha ni nga ai, lawu myen mung kaw nna, anhte Jinghpaw ni nga ai, Jinghpaw lamu ga de, mung maden shang wa ai lam nga wa sai. Ndai zawn English mung maden ni, tinang mungdan lamu ga de shang wa ai shaloi, anhte a ji wa ni gaw, shanhte lu ai laknak n-gun hte ning hkap gasat nna,anhte a lamu ga hpe makawp maga lai wa sai.Mugawng mare kaw shanu nga ai, mung maden English hpyen dap hpe Sam hte Jinghpaw ni rau jawm nna gasat shachyut ai lam labau hta mu lu ai. Bai nna, SADUNG, SAMA ,hte sinpraw hkran maga, shang maden bang wa ai, mung maden hpyen ni hpe anhte a ji`wa ni gaw, shanhte lu ai n-gun hte shanhte a asak hpe ap nawng nna, anhte a lamu ga hpe makawp maga lai wa sai.Ndai zawn tinang mung hpe makawp maga ai shaloi,chyiwa ni law law sak sum hkam lai wa sai.Ya Miwa mung maga rai nga ai, Saphkung mung lamu ga ni de English ni, mung maden shang wa ai shaloi mung, anhte a ji wa Maran Zau Tawng woi awn nna, anhte a lamu ga hpe shi a asak sum ai shani du hkra, gasat makawp maga lai wa sai. Bai nna, Ya INDIA mung dan maga lawm mat sai Jinghpaw ni nga ai sha ra de, English mung maden ni shang wa ai shaloi mung, anhte a ji`wa ni gaw, shanhte a asak sum ai shani du hkra,asak apnawng makawp maga lai wa sai.(Dai zawn tinang lamu ga hpe makawp maga ai shaloi,Ningru duwa hte Pyisa du wa ni woi awn gasat ai re. Shanhte a asak ap nawng lai wa sai. Ndai majan ni hta`Hogawng ga kaw shanu nga ai, Jinghpaw amyu ni gaw, shata mi jan nam mali hpe dawk nna dai majan hpe sa garum lai wa sai.)

ENGLISH PRAT HTE JAPAN MAJAN PRAT.
1926 ning kaw nna, gaw, anhte a chyiwa ni kade makawp ai raitim n-gun n bung ai majaw, English mung maden wa a lata kaw, anhte amyu ni nga ra mat sai. English ni up hkang ai kata kaw nga ai ten hta` 1942 ning a hpang daw de Japan ni gaw, Myen mung hku nna, anhte Jinghpaw ni nga ai shara de shang gasat shanu nga sai. Dai zawn japan ni gaw, anhte a lamu ga de shang gasat nga wa ai hpe anhte a ji` wa myutsaw share shagan ni gaw, Mungkan Myit Hkrum Hpung, rai nga ai, English hte American hpyen hpung ni hte rau bawng nna, Japan ni hpe jawm gasat la sai.

MYEN NI HTE SHANGLAWT RAU LA SAI.
Anhte a ji wa ni gaw, mungkan majan 2 ngut ai hpang, anhte a lamu ga hpe bai lu la wa sai. Dai aten hta` anhte a ji`wa ni gaw, Myen amyu ni hte bawng nna, English kaw na shanglawt rau la na matu galaw wa sai.12/2/1947ning, PANGLUNG mare kaw shanglawt rau jawm la na matu myit hkrum nna, SAM, HKANG, KARINNI , MYEN HTE JINGHPAW ni gaw myit hkrum lata masat jawm mahkret sai. Dai PANGLUNG myit hkrum lata mahkret hpe hkan nna, anhte Jinghpaw ni gaw Myen amyu hte bawng nna, shanglawt rau jawm la sai.Myen Munghkawm Mungdan ngu shamying nna, rau jawm nga sai. Ndai zawn, Myen mung shanglawt lu ai hpang kade n na yang, 26/3/1948 shani e, Myen amyu ni nan, Myen asuya hpe rawt malan hpang wa sai. 28/3/1948 ya hta nan, Myen asuya gaw, Myen rawt malan hpung ni hpe gasat ai lam galaw sai.1949ning, shaning n nan ai hte rau,KAYIN ni mung, Myen asuya hpe rawt malan hpang wa sai. PAOo ni mung 1949 ning December shata hta rawt malan hpang wa sai.

DUKABA LAHPAI NAWSENG RAWT MALAN AI LAM
Myen Mung shanglawt lu ai hte rau, Myen Communist ni hte KAYIN ni gaw, Myen asuya hpe rawt malan hpang wa sai.1948 ning april shata hta, Naw Seng a Jinghpaw hpyen dap ni hpe, Myen Communist ni hpe gasat shangun sai.Matut nna, Myen asuya gaw, Dukaba Naw Seng dap ni hpe, Kayin ni hpe mung , matut gasat na matu aming jaw wa sai. Dai zawn, tinang amyu bawsang shada hpe gasat shangun ai majaw, Dukaba Naw Seng gaw, myit n pyaw mat ai.Myen asuya a masha sat lai ladat hpe n ra ai. Myen amyu ni a myit magaw, wa ai lam hpe mu wa sai. Dai majaw, Du Kaba Naw Seng gaw, 16/2/1949 ya shani kaw nna, Myen asuya hpe madaw, rawt malan hpang wa sai. Shi a hpyen hpung hpe gaw Pawng Yawng Hpyen Dap ngu shamying nna, rawt sa wa sai.Dai zawn, Du Kaba Naw Seng gaw Pawng Yawng hpyen dap hpe woi awn nna, Mandalay , Maymyo., Lashio mare ni hpe langai hpang langai zing madu wa sai. Dai zawn, Du Kaba Naw Seng gaw, Jinghpaw Mungdan shanglawt lu hkra nga nna rawt malan sa wa sai. Dai zawn rawt malan ai hpung ni hpe kaga Jinghpaw dap ni hpe dat nna, Myen asuya gaw bai gasat shangun ai . Du Kaba Naw Seng gaw Jinghpaw shada da n kam gasat ai majaw, Miwa Mung de shang shanu nga sai.( Du kaba Lahpai Naw Seng gaw, Jinghpaw Mung shanglawt lu na matu, shawng nnan rawt malan ai ningbaw wa re.)

KIO/KIA NI WOI AWN AI JINGHPAW NI A RAWT MALAN HKRUN LAM
Jinghpaw Wupawng amyu sha ni gaw, Myen amyu baw sang ni hte kaga amyu ni yawng jawm nga ai mungdan hpe de nna, angwi apyaw hte rau jawm nga mayu ai.Raitim, Myen amyu ni gaw myit magaw rawng ai. Rap ra ai tara hpe n lang ai. Makam masham lam hta` mung, shanhte naw` ai Bukda` makam masham hpe sha naw` shangun ai. Munghkawm mung masa ladat hpe n lang wa ai majaw, Jinghpaw ni shanglawt rawt malan ai lam hpe galaw wa sai.5/2/1961 ya kaw nna, Jinghpaw ningbaw Lahtaw Zau Seng gaw, KIO, ngu ai Jinghpaw shanglawt mung masa hpung langai hpaw ai. KIA ngu ai Jinghpaw shanglawt hpyen dap hpe hpaw shabawn la nna, Jinghpaw amyu ni shanglawt lu hkra, Jinghpaw Mungdan lu hkra nga nna rawt malan hpang wa sai.( Ndai zawn rawt malan hpang wa ai shani hpe Rawt Malan Ninghtoi masat ai lam re.) Dai zawn, KIO, KIA hpyen hpung ni gaw, Myen asuya a,n tara ai hte dip rip uphkang sha ai lailen hpe n ra ai majaw,Myen mung kaw nna, Jinghpaw ni pru n htawm,tinang hkrai laksan awmdawm ahkaw ahkang hte hpring zup ai, JINGHPAW WUNPAWNG MUNGDAN de la na matu rawt malan hpang wa ai re. Dai zawn, KIO,KIA ni rawt malan woi ai lam hpe Jinghpaw Wunpawng mungchying mungshawa yawng, madi shadaw ai majaw, KIA rawt malan hpyendap gaw,lani hte lani n-gun kaba wa nna, Jinghpaw Mung ting hpring rai wa nga sai. Ndai zawn, Jinghpaw ni a shanglawt rawt malan ai lam hpe Myen hpyen dap ni gaw, shani shagu, Jinghpaw Mung shara shagu de sa nna laja lana gasat ai lam hpe galaw wa sai.

Ndai zawn, Myen hpyen dap ni gaw, Jinghpaw amyu ni hpe gasat shamyit ai lamang ni hpe lani hte lani grau grau shaja galaw wa sai. 1965-1967, ndai shaning ni hta` Myen hpyen dap ni gaw, n-gun ja dik ai, shanhte a hpyen ma law law hpe dat nna, Jinghpaw amyu ni hpe gasat shamyit bang wa sai. Dai zawn, Myen hpyen dap a laja lana gasat wa ai majaw, anhte Jinghpaw buga mare ni yawng hten mat sai. Jinghpaw amyu sha ni, mun mun, sen sen wa asak sum mat sai. Jinghpaw amyu sha ni nga ai shara, 95% gaw yawng hten mat sai. KIA hpyen hpung ni mung ram ram jamjau hkrum sha sai. Raitim, mungshawa masha ni madi shadaw ai majaw, n-gun bai awai la nna,Shanglawt majan hpe matut ding yang gasat nga ai.

1967 hta Jinghpaw ningbaw Maran Brang Seng gaw, Miwa Mung Communist asuya kaw garum sa hpyi ai majaw, Miwa Communist asuya madi shadaw ai lam hpe lu la ai.1968 ning kaw nna, 1972 ning laman hta gaw, GOC Lahtaw Zau Seng gaw, Htai Mungdan kata kaw shanu nna, rawt malan uhpung galu kaba wa na matu, matut shakut nga ai majaw, anhte a KIO, KIA hpung gaw, lani hte lani n-gun ja wa nga sai.1972 ning hta KIO gaw, Myen asuya hte gap hkat jahkring nna,Mung Masa hpe saboi ntsa kaw bawngban ai lam galaw wa sai. Awng dang ai lam n nga ai. N-awng dang ai sha n-ga, Myen asuya gaw, KIA hpyen hpung ni Htai Mung kaw nna Jinghpaw Mung de lung wa ai lam kaw, sadi run nna, zai ai ladat hte gasat ai lamang hpe galaw sai. Dai zawn, Myen ni sadi run ai majaw, anhte a myutsaw hpyen la/num ni law law asak sum hkrum mat sai.

1972 ning a hpang daw de, Myen hte Jinghpaw ni laja lana bai gasat ai lam byin sai. KIA hpyen hpung ni ram ram awng padang lu la ai lam nga ai. Mungkan mungdan shara shagu de mung matut mahkai nna, rawt malan bungli hpe galaw nga ai.1975 ning hta gaw, anhte a ningbaw kaba GOC Lahtaw Zau Seng, Lahtaw Zau Tu, Duwa Pung Shwi Zau Seng ni hpe, tai hpyen wa a masha ni Thai ga jarit kaw gyam sat kau ai hkrum sai. Ndai zawn byin ai gaw, anhte Jinghpaw labau hta` ndang tsun ai sum kaba rai sai. (Ndai ning baw ni gaw, shanhte a asak sum ai shani du hkra, Jinghpaw Mung shanglawt lu na matu shakut lai wa sai.) Raitim, 1975 ning kaw, KIO ningbaw nnan bai galai la sai. 1976-1980 ning ni hta, KIO ningbaw ningnan Maran Brang Seng bai tai wa sai. Ningbaw malai T/UP malai gaw Dukaba Malizup Zau Mai bai matut galaw wa sai. Ndai ningbaw yen woi awn nna, Jinghpaw ni shanglawt lu na lam hta` aja` awa` shakut wa sai.1980-81 ning hta kalang mi bai Myen asuya hte gaphkat jahkring nna,mung masa hpe saboi ntsa kaw bai jawm jahta sai. KIO u hpung hku nna myit kaba hte shagrit shangyem ai lam galaw ai raitim, Myen asuya kaw nna, myit hpraw san ai hte galaw ai lam nnga ai majaw n-awng dang ai.1981 ning kaw nna, majan pa de bai du sai. Jinghpaw Wunpawng bu ga, mare ni law law hpe wan nat ai lam hkrum sha ai. Jinghpaw Wunpawng amyu sha, kaji kaba, num la law law wa asak sum ai lam, zinri zinrat ai lam, hkrum sha nga sai.

1982-1990 ning, ndai laman hta` anhte a ningbaw kaba Maran Brang Seng gaw, mungkan mungdan law law de sa nna, anhte amyu lawt lu na matu hte Myen mung DEMOCRACY byin wa na matu grai shakut hkawm lai wa sai. Ndai zawn, ningbaw kaba maigan ga de, mung masa shamu shamawt wa ai shaloi, Maigan kaw du nga ai Jinghpaw ningbaw ni law law rau jawm shakut sai.Jinghpaw ni a mung masa hkrun lam ni hta` ram ram awngdang ai ten ni rai nga ai. Mungkan kaw nna mung, Jinghpaw ni tsun ai hpe ram ram wa madi shadaw wa nga sai.1992, hta` Myen hte ga bai shaga na matu byin wa sai. Raitim, Myen hpyen dap ni tsun ai gaw, KIO,KIA, ni laknak jahkrat jang she ga shaga na re ai lam tsun ai majaw, n byin mat sai.1993 ning hta gaw, Jinghpaw lapran salang masum, bai grai shakut wa ai majaw, Myen hte shaga na lam bai byin wa ai.Ndai zawn re ai lamang ni hpe matut galaw na matu, lajang nga ai ten hta` ningbaw kaba Maran Brang Seng gaw, akajawng sha machyi kaba byin wa sai.Dai majaw, 1994 ning February 24 ya shani gap hkat jahkring ai lam hpe Tingnyang Up malai Dukaba Malizup Zau Mai hte Dukaba Gauri Zau Seng woi awn nna galaw sai. 1994 shata man 8 hta, anhte a ningbaw kaba Maran Brang Seng gaw, shi grai tsawra ai amyu hte mungdan hpe tawn da nna,asak sum mat sai.

1994 ning kaw nna, 20/2/2001 ya shani du hkra, Myen hpyen dap asuya hte anhte KIO, KIA ni gaw, gaphkat jahkring nna, mung masa hpe saboi ntsa kaw bawng na matu shakut sai. Ndai aten ni hta, Ningbaw kaba Malizup Zau Mai woi awn ai ten rai nga ai. Tinang KIO, kaw nna, saboi ntsa kaw, mung masa galaw na matu kade shakut tim, awng dang ai lam n nga ai. Dai hpang 2001 ning hta ningbaw n nan galai sai.Dukaba Lamung Tu Jai hpe ningbaw bai tang sai. 2001 ning kaw nna,ya dai ni 2006 ning February praw 5 ya shani du hkra gaw ningbaw kaba Lamung Tu Jai woi awn nna, rawt malan bungli hpe galaw nga ai. Anhte a kanu kawa rawt malan hpung KIO, KIA kaw nna gaw, shanhte a n-gun atsam rawng ai daram gaw, shakut lai wa sai .KIO, KIA u hpung ningbaw ni, hpyen la ni, salang ni gaw, n kau mi asak du baw sum ai shani du hkra shakut sai.Ya n kau mi lagaw lata daw hkra, ba jamjau ai ten du hkra shakut sai. N kau mi kade ruyak jamjau tim, prat asak kung kaba n ngut n jin ai ten du hkra, tinang atsam rawng ai made shaw nna, shakut lai wa sai.( Ndai gaw KIO, KIA , hpung kaw nna, rawt malan bungli hpe galaw wa ai labau lam rai sai.)

YA YANG BYIN NGA AI MUNG MASA SAT LAWAT
Ya yang byin nga ai, Myen mung a mung masa sat lawat hpe hkan nna Jinghpaw ni a mung masa hpe yu yu ai shaloi,ram ram wa n sin chyip rai nga ai hpe mu lu ai. Dai ni, Myen mung kaw, Democracy mung masa lam hpe lu la na matu, amyu bawsang shagu,u hpung shagu shakut nga ai hpe mu lu ai.Hpyen asuya ya galai nna, Mungshawa gawng malai tai ya ai asuya tai hkra shakut nga ai hpe mu lu nga ai.

Myen mung a mung masa hpe Democracy mung masa byin hkra shakut ai lam hta` NLD mung masa hpung ni mung, Myen mung shawa hte lata gindun nna, shakut nga ai hpe mu lu ai. Ndai zawn shakut ai lam hta` Mung masa la ni law law wa sat hkrum ai,htawng bang hkrum ai, zing ri hkrum sha nga ai. Bai nna, kaga amyu masha, mung masa hpung ni hku nna mung, Myen mung hpe Democracy byin wa na matu, mung masa hpung hpaw nna, shani shana shakut nga ai hpe mu lu nga ai. Ndai zawn shakut nga ai ni hpe mung, hpyen asuya gaw, sat kau ai lam, htawng bang ai lam, zing ri ai lam ni galaw nna, shamyit hkrum sha nga ai.SNLD ( Sam, mung masa ningbaw ni hpe shaning law law htawng jahkrat kau nga ai, mung masa hpung ni hpe dawm kau ya ai.) Bai kaga Myen n re ai, amyu bawsang lak nak lang ai u hpung law law ni mung, gasat gala ai lam hpe jahkring nna, Mung masa hpe saboi ntsa kaw bawngban ai lam hpe galaw nga ma ai. Raitim, dai laknak lang ai, mung masa hpung ni tang shawn ai lam hpe Myen hpyen dap gaw n hkap la ya ai. Kaja wa mung masa atsawm woi galaw ai lam n nga ai. Dai zawn re ai kata kaw, gaphkat jaghkring la tawn ai, u hpung n kau ni mung, bai gasat wa ai ni mung nga ai.( Sam , Karinni ,mun ni) Gap hkat jahkring tawn ai, mung masa hpung n kau mi gaw, Myen hpyen dap ni hte kanawn na yak la ai masa lam hta,` mung masa hpe shakut bawng nga ai. Ndai zawn shakut bawng ai ni hpe mung, dan dan leng leng masha sat nna roi sha nga ai. Mung masa hpe manu dan sari rawng ai hku nwoi galaw ai.( 2001 ning march shata, hta` sun galaw nga ai KIA hpyen la ni hpe shaga la nna, majoi sat sharu kau ai. 2/1/2006 ya shani mung , KIA hpyen la ni hte mung shawa ni hpe mara kata majoi shaga sat kau ai.)

Bai nna, maga mi hku nga yang, mung shawa masha myit n hkrum ai hpe maja` shaga la nna, shanhte galaw ai mung masa hpe madi shadaw shangun ai. Shanhte hpyen dap ni galaw ai mung masa lam yan gaw, mung shawa yawng a matu akyu n rawng ai. Lani mi shanhte nan nan, mung masha tai wa ai sha ni mung, akyu rawng na n re. Mungkan mungdan ni mung, shanhte galaw ai mung masa lam hpe n madi shadaw ai.

Bai nna, Myen n re ai mung masa hpung ni, amyu bawsang ni law law gaw, Myenmung kaw e jet ai Federal mungdan byin hkra nga nna, shakut nga ai hpe mu lu nga ai. Dai u hpung gaw, Ethnic National Council (ENC) ngu shamying nna, Jinghpaw, Kayin, Karinni, Hkang, Mun, Rahkai, hte Sam amyu bawsang ni yawng shang lawm nna hpaw shabawn da ai hpung ni re. Ndai hpung kaw shang lawm ai hpung ni yawng gaw, Myen hpyendap hte lata tut gasat nga ai hpung ni rai nna, hpung n kau mi gaw, gasat jahkring da ai ni mung shang lawm nga ai.

Ndai zawn, lam yan amyu myu hku nna shakut nga ai ten hta`anhte Jinghpaw ni kaw byin nga ai lam ni gaw,laklai shai nga ai hpe bai hkrum sha nga ga ai. KIO ningbaw ni kaw nna, ladat amyu myu shaw let, shakut ai rai tim, n-awng dang ai majaw n-gun matut dat na matu yak nga sai.Dai majaw, KIO, ni hpe hkrai mara shagun nga nna gaw, anhte amyu ni n mai tsap nga sai.

RAWT MALAN AWNGDANG NA MATU GARA HKU GALAW NA.
Anhte Jinghpaw Wunpawng amyu sha ni rawt malan awng dang na matu, gara ladat hte jawm galaw na ta? Shada hkrai mara shagun nga ai lam gaw, n jaw sai.Dai majaw, anhte amyu ni yawng gaw,

1. Ngang kang ai bandung langai da ra sai.
2. Jinghpaw Wunpawng Amyu ni hpe atsawm sha lu woi awn na, mung masa lam hpe gaw ra sai. Dai hpung hpe woi awn na masha lu ra ai.
3. Mungchying mungshawa kaji kaba yawng shanglawm ra sai.
4. Ya yang amyusha ni hpe woi awn nga ai, mung masa hpung ni yawng myit hkrum ra sai.(KIO,NDAK,KDA,KNO)
5. Mungdan kata kaw nga ai prat ram ni yawng, rawt malan lam hta shanglawm n-gun dat ra sai.
6. Maigan mungdan shara shagu kaw nga ai ni yawng,Ja gumhpaw n-gun, hpaji n-gun, hkum hkrang n-gun yawng gahkyin la ra sai.
( moi shawng e miwa mung hpe sinna mung ni garan up sha ai kaw nna, bai lu hkye la na matu, MIWA ningbaw, Dr.Sunyet Sin gaw,mungdan shing gan kaw nga ai miwa amyu ni a n-gun hpe la nna, dai ni na mungkan hta` kaba dik ai,n-gun ja dik ai miwa mung hpe hkyela da ai re. Dai majaw, anhte a manu dan dik la ai, Jinghpaw Wunpawng Mungdan hpe mung, maigan ga kaw du nga sai amyu sha ni yawng, jawm n-gun dat nna hkye la ra sai.)

Dai majaw, dai ni n dai shanglawt rawt malan hpang wa ai shani kaw e, anhte a hpyen du hpyen gyi, hpyen la ni yawng,hpe tsun mayu ai gaw, hpu shawng hpu ba, ningbaw ningla ni gaw de hpang da sai, shanglawt rawt malan magam hpe awngdang hkra, myutsaw myit sharawt, magrau grang grang hte matut shakut sa wa ga. Bai nna, mungchying mungshawa kaji kaba yawng mung, anhte amyu bawsang ni lawt lu ai shani du hkra n-gun dat sa wa ga. Grau nna, Mungdan shinggan kaw du nga sai, anhte amyu sha ni yawng gaw, tinang amyu hte tinang a mungdan hpe hkye la lu na matu, hpaji n-gun, ja gumhpaw n-gun hte hkum hkrang n-gun hpe jawm n-gun dat sa wa saga. Anhte mungdan, anhte amyu lawt lu na matu jawm n-gun dat sa wa saga. Ngu nna ga hpumdim dat n ngai law.

Rawt malan ai lam awng dang u ga.
Jinghpaw Wunpawng amyu sha ni lawt lu u ga.
Jinghpaw Mungdan grin nga u ga.

Jinghpaw Wunpawng amyu sha yawng hpe tsawra let,

BAWMWANG LARAW
NINGBAW
JINGHPAW WUNPAWNG AMYUSHA KONGSI,
JINGHPAW WUNPAWNG AMYUSHA HPUNG.