Myitkyina-Laiza lam lapran e nga ai Lajayang myen hpyen gate hta hkawm wa hkawm sa, laiwa laisa masha ni hpe laja lana jep nga ai lam chye lu ai.

Lajayang gate kaw myen hpyen la ni kata labu du hkra sawk jep nga ma ai nga nna  buga masha langai tsun dan wa ai.

Myitkyina mare de shang wa ai Ake-Shadau gate kaw mung lungseng htaw mawdaw ni hpe rim zing ai lam galaw ai nga nna dai buga masha kaw na chye lu ai.

Lajayang gate hta ya na zawn bu hpun da ai labu palawng kata kaw du hkra jep sawk ai lam galaw wa ai gaw lai wa sai July shata 8 kaw nna 11 ya du hkra KIO/KIA hte myen mung dingdung daw ginwang hpyen dap daju Major General Soe Win ni gaw Jarit Sin Dap (Border Guard Force) hte seng na bawngban ngut ai hpang byin pru wa ai lam ni re nga nna buga masha tsun dan wa ai.

Myen hpyen asuya hte hkrum shaga bawngban hpawng hta KIO/KIA ni gaw (Kachin Regional Guard Force) de mahtang hkrang galai sa wa mayu ai lam hpe myen hpyen ni hpe tang madun lai wa sai.

Ya ten du hkra myen hpyen asuya gaw KIO/KIA tang madun da ai lam hpe tsun shaga ai lam hpa nnga shi ai rai nga ai.

Ndai bat laman Myitkyina-Laiza lam hpe pat na re nga nna shiga mawng nga ai hpe mung buga masha langai tsun dan wa ai.

Ndai laman hta Myitkyina mare kaba hta hkawm wa hkawm sa let jahkring jahkra manam nna, Mare salang ni hpe jahpan n jaw, n shana ai manam ni hpe mung grai san jep nga ai lam chye lu ga ai.