June 20, 2009

Dindung Korea asuya gaw Pacific zinglawng maga de pala pyen (missile) hpe kapaw gap wa mai ai ngu nna shiga pru wa ai hpang American mungdan gaw Hawaii zinglawng grup yin kaw pala pyen hpe ninghkap makawp maga lu ai ladat ni hpe jin jin hkyen lajang da ngut sai lam American hpyen dap kawn tsun wa ai.

American mungdan hpyen makawp maga dap hkring mang Robert Gates tsun ai hta American mungdan gaw tinang a mungdan hpe makawp maga na matu ra ahkyak ai lam ni hpe galaw shajin da ngut sai nga nna tsun wa ai.

Laiwa sai bat mali ya shani shapraw ai “Daily Yomiuri” ngu ai Japan shi laika hta Dingdung Korea gaw July shata  praw hta Hawaii zinglawng maga de madung tawn nna sumtsan gap ai pala pyen(missile) hpe gap shalun na matu hkyen lajang nga ai nga nna ka tawn da ai re.

May shata 30 ya shani mung “Taepodin 2” pala pyen langai hte dai hta grau atsam ningja n’gun rawng ai pala pyen langai hpe Dingdung Korea a Sinna Dingda pala pyen gap ai shara kaw nna gap shalun dat ai gaw Hawaii zinlawng hpe gap na matu shajin ai lam mai byin ai nga nna Jappan hpyen makawp maga hkring mang tsun wa ai hpe dai “Daily Yomiuri” shiga kaw matut nna ka da ai.

American Hpyen Makawp Dap Hkring Mang Robert Gates gaw Hawaii kaw pala pyen hpe ninghkap ai arung arai hte ladat ni hpe jin jin hkyen lajang da na matu ahkang jaw da sai re lam tsun wa ai. Dai hta sha n ga American hku nna Dingdung Korea a pala pyen gap ai lam ni hpe ni ni htep htep yu maram nga ai lam hpe mung tsun mat wa sai. VOA