13th, May, 2009

Ga jarik sin hpyen dap hku na hkrang gale kau n htawm mungdang kata kaw hpyendap langai sha hku nna myen hpyen dap hte arau jawm pawng sa wa na matu Jinghpaw Wunpawng mung shawa a myit hkrum lam ra ahkayk nga ai nga nna Wunpawng Mungdan shawnglawt hpung (KIO) kawn tsun wa ai.

Lai wa sai April shata 28 ya shani hta e myen hpyen asuya a matsun wa ai lam hte la kap nna Jinghpaw mung hkrang galai shai ai ladaw lit hkam, KIO Tingyang up (2) Dr. Tu Ja tsun wa ai rai nga ai. Ya aten hta gaw ga jarik sin dap galai shai na hte seng nna KIO gaw ginjaw komiti zuphpawng galaw nna mahtai tam nga ai lam mung chye lu ai.


KIO hku nna ga jarik sin hpyen dap hku hkrang gale sa wa na matu hkyen lajang nga sai kun?

Myen hpyen asuya hku nna tsun ai she re. Anthe KIO hku nna gaw naw bawng ban ra ai. KIO ningbaw ni, mungchying shawa ni yawng hte hkut hkut nai nai bawng ban ngut yang she ndai ginlam hpe daw dan ra na re.

Galoi ten kaw na Myen hpyen asuya wa tsun ai ta?

Lai wa sai April shata 28 ya shani dingdung myen hpyen dap up daju Soe Win gaw KIO ginjaw Ningbaw Kaba hte malawm ni hpe saw shaga nna bawng ma  ai. Dai bawng ban zuphpawng hta hpyen asuya gaw shanhte hkyen lajang da ai masa lam hpe shaga tsun dan ai. Dai lam hpe sang lang dan ai. KIO ni a myit masa lam hpa mung myen hpyen wa hpe n lu tsun dan ai. Dai hku sha zuphpawng shangut kau ai. Dai hpang, KIO ginjaw hku nna ginjaw salang ni hpe shaga la nna gara masa lam hku galaw sa wa ra na hpe sung sung bawngban na matu lajang nga ma ai. Ya ten ginjaw zuphpawng galaw nga ma ai.

Ya yang Ginjaw komiti gaw hpa hpe madung da nna bawng ban nga ai rai?

Madung gaw Ga jarik sin dap de hkrang gale  sa wa na hte seng nna bawng ban nga ai.

Ga jarik sin dap galaw byin yang ya yang na KIO/KIA hpyen n-gun hte gaw mai na kun?

Ndai gaw hpyen n-gun hpe gara hku na masat na re hpe gaw hpa n chye tsun shi ai. Lama na galaw byin mat wa yang pyi shada da hkut hkut nai nai bawng ban la na she, ta tut galaw sa wa ra ai le. Hpyen dap hpe hkrang galai kau na hte seng na myit hkrum sai nga yang mung ta tut galaw na matu shada da bawng ban jahkrup lam ni naw ra na re ngu KIO salang ni mu mada ma ai.

Ga jarik sin dap hku gale na hte seng nna hparan ra na manghkang ni nga ai kun?

Ya yang gaw hpyen asuya wa hte KIO lapran bawng ban ai lam hta galai shai ra sai aten ladaw langai kaw du taw nga sai ngu hpe gaw mai tsun ai. Ta tut galaw lu na matu gaw aten grai naw la ra ai, jahkrup bawng ban na she galaw ra na re. Anhte gaw bawng ban jarhkup mayu ai. KIO gaw tinang amyu sha yawng a matu, tinang lamu ga a matu gawng malai tai nna shakut shaja wa ai wuhpung re. Ndai hpe kaji kajaw hku nna n mu mada da ai sha ahkyak ai re ngu, shada da atsawm bawng ban let bungli hpe hpang ra na re. Ndai hpe KIO salang ni chyawm gaw hkap la mai ai re ngu hpe mu mada ma ai. Rai tim ta tut galaw ra ai gaw grai  naw bawngban ra na re.       
 

Ga jarik sin dap hku na da na nga yang KIO hpe gara shara hkan da na rai?

Tup hkrak re gaw n-chye shi ai. Hpyen asuya maga na mung tsun ai gaw n nga shi ai. Rai tim ga jarik hkan gaw mai byin na re. Mungdan ga da ga na jahkrat da ai tara upadi ni hte maren rai na re. Ga jarik sin dap ni hpe jarik kaw na gade daram tsan ai du hkra da mai ai, ngu ai tara ni nga ai. Dai hku galaw sa na matu galaw ra ai.  


Ya yang KIO n-gun gade nga ai?

Dai gaw tup hkrak n lu tsun ai. Tup hkrak n chye ai. Ngai gaw hpyen dap hte seng nna loi tsan taw ai.


Ya hte sha General Thein Sein Myitkyina du sa ai. Ndai jarik sin dap hte seng ti bawngban byin ai kun?

Hkring mang daju Jinghpaw mung sa du ai shaloi n hkrum byin ai. Gaga amu magam hte sa du ai re.

Dr. Tu ja hku, ga jarik sin dap galaw byin mat na ngu shadu ai kun? Gara hku maram lu ai?

Ya yang byin nga ai mung masa hta hkan nna sung sung myit yu ra ai ngu na mu mada ai. Atang ahpa hte anhte n mai yu ai. Sung sung myit yu nna simsa lam ngang grin na matu galaw ra na re. Hkrang galai ai lam hpe myit ai shaloi mung shada chyena ya ai(ashaw atin, apay ayu) hte kaja wa nan  simsa lam hpe ngang grin ai hku gaw gap sa mai ai masa de du wa hkra, hkrak tup galaw ra na sha re. Dai majaw anhte mung masa hta hkan nna KIO sha n-ga kaga bawsang lak nak lang wuhpung yawng mung re.

Asuya a masing gaw hkrang galai sa wa ai masa lam hte ndai mang hkang ni hpe hparan mat wa na ladat re. Dai majaw ndai zawn re lamang hpe sung sung myit yu nna, kaja dik ai hku sawn yu myit yu nna mahtai shapraw sa wa lu na matu ahkyak nga ai. Maga mi de sha n rai ai sha, lahkawng maga hku na sang sang lang lang, asan brang re rai nna rau jawm let, mahtai lu shapraw yang gaw akyu nga wa na re hpe mu mada ai.


Baw sang lak nak lang ni hku nna ga jarik sin dap hku nna byin wa yang kaja wa nan langai sha re ai hpyen dap byin wa na re hpe kam mai na kun?

Ga jarik sin dap hku nna galai dat sai kaw na gaw uphkang masa langai a npu kaw du mat sai. Hpyen dap langai a npu de du mat sai. Hpeyn dap na lakung lakap ni tai mat sai. Dai majaw mungdan langai kaw hpyen dap langai sha nga ai ngu masa re.

KIO hku nna ga jarik dap de gale na, n gale na gaw kaga bawsang lak nak lang wuhpung ni hte bawng ban na kun? shing n rai hpyen ausya hte sha bawng na kun?

Hpu nau bawsang lak nak lang wuhpung ni ngu ai gaw prat masa lam mung bung ai majaw bawng ban yang gaw kaja ai. Rai tim masa lam hta sha hkan na re. Ndai lam ni gaw masa lam a majaw bawngban ai lam ni n-galaw tim pyi, myit da ai lam ni gaw shai na n-re ngu shadu ai.

Ndai hte seng nna masa lam hta hkan na sha anhte ni galaw sa wa na re. Madung gaw tinang wuhpung kata kaw hkut hkut nai nai bawng ban nna tinang na amyu sha hte Du salang ni hku nna hkut hkut nai nai bawng ban nna galaw sa ra na re.


KIO hku nna ga jarik sin dap de gale na, n-gale na mang hkang gaw Jinghpaw Wunpawng amyu sha ni a ra sharawng lam ni hpe hta shingyin la na kun?

Ndai gaw ra na re. Ra na shadu ai. Hpa majaw nga yang KIO ngu ai gaw Jinghpaw Wunpawng amyu sha ni a mai kaja lam hpe galaw nga ai wuhpung, shamu shamawt nga ai wuhpung wuhpawng langai re ai. Jinghpaw Wunpawng amyu sha ni hpe gawng malai tai ya ai wuhpug mung re ai majaw ndai manghkang hta Jinghpaw Wunpawng Amyu sha ni a ra sharawng ai lam ma lawm ra na tai ai. KIO ginjaw kaw na sha dawdan minit jahkrat dat yang ngang grin ai simsa lam lu la na n re.

Myen hpyen dap hpe kam mai na kun?

Ndai gaw anhte ni hpa hpe mung bawng ban tim jahkrup mat wa na re. Ngai hku na gaw hpa hpe mung kaja ai hku mu mada ai. Galaw ai lam hta mung (apyu da baw) galaw ai. Hpa lam hta tim, ta tut galaw yu yang she mahtai le wa ai. Tinang amyu sha ni a mai kaja lam hpe galaw ai re nga yang hkrum jahta ai lam hpe grai hkap tau la na re.

Hkrum jahta na nga yang gaw hpyen asuya gaw gadai ni hte hkrum shaga na?

Anhte maga na gaw dai hku masat dat ai lam n nga ai. Seng ang ai salang ni hte hkrum shaga na dai daram sha re. Gara masha, gara madang hte she hkrum shaga na ngu n masat da ai.

Jinghpaw Wunpawng mungchying sha ni a myit masa hpe gara hku hta la na masing nga ai rai?

Ndai gaw anhte dep ai daram galaw na re.

(Mizzima shiga dap kawn ga gale da ai re.)