Mungkan pin ra shing gyim masha, ngu dai daw masat, nga pra hkrat wa ai kaw na gaw, amyu ngu ai nga, lakung lama ngu pra hkrat wa sai. Ngai shagawng pukdun hkra u gaw, manu rawng dik ai. Wunpawng jinghpaw amyu hta sa paw ang ai majaw shawng ning nan e, hpan wa Karai a chyeju hpe shawng shakawn n ngai rai.

Mungkan pin ra kalang sha pra, "pukdun hkra u" zawn pyen yawn, manu rawng dik ai chyu rum wunpawng sha ni a mung dan hpe pyen gawn, oh Hpu wa, Nau wa, she jahta yu ga le! Bum shagawng, pa layang, krung sin wa, hkaraw hkam wam, tsit tsawm hpun kawa, aja lungseng, badi, pattamya, diamond, hpri n hprang gali lakan shawa nang hka chyi, jut shagu hpring gabrat nga ai hpe mu n ngai le! Tsi ru, tsi pawt, "sawa yawn tsi" "n lung matut tsi" n-gun sai tsi shabrang, mahkawn, gum gai, ding la, a zet a tsang, amyin ahkyeng, ladu lai n-gun nga wa ai baw ni mung, hpring chyat, tu sum up jawng nga ai hpe mung, mu n ngai le!

Ngai tsun ai sha hkum kam, hpu, wa, ni, tsa, jum chyi, hkau hteng mapyen singkaw shatut nna she yawn pyen yu saga! um.... Nanhte ni mung mu ai n rai i? Goi sha, goi sha, waw ra zawn nan, hpring shachyaw jawng ai wa i? um... Mangoi na zawn, n ja na zawn, marit na zawn, de du, de shang, prat janat, amyu sha ni, prat, ban, kade shagup tim dang ma hpa n rai nga ai le i? Bum, pa layang ga sau nam hpun htat chyang ai mung, "Gala mai dang" hpa jaw prat, latsa hkai sha tim dang ma hpa n rai nga ai le i?

Um... Hkau hteng e, ji wa ni a Sali kam htaw, sut gan, ja maw, lung seng pung hkaw, nam nga du sat, manu dan ai, adun dum bau, magwi, sharaw, du sat du myeng, hkum ding num, u rawng udat, abum, marawn, lung bra, lung htawn hkan chyai kabrat nga ma ai le i? um... Hpu, wa, nau, na, ni e, dai sha n-ga, Hu gawng manep, Ta Rung, Tawang, Dabyi hka masawn – Indaw, lai nawng, mogawng hka masawn –mali, n mai, ngaw chang hka masawn – shawili, sup hkung, nam Hkai hka masawn u hpyin, u lai, nga ti, nga hpai, tau ku, tau kawk, tau bren, ba sawk la, hka tsu tu, atawng apa, kanawn ai ga wa le i?

Oh.... tsaw ra ai, wunpawng myu sha annau ni, manu daw dan n lu ai, sut ring sut chying ai , mung dan hpan wa Karai anhte hpe jaw da sai, chye ju shakawn, shagrau ga le! Malap mali nga n mai, n dum shamyi asak hkrung n mai, sawn yu ga, sum ru yu ga, ndai zawn hkum tsup, tsawm htap ai mung dan gaw, anhte hpe rai nna, jaw ai she rai sai. Chyu rum ai an nau ni, sha mat jasum kau n mai na ga ai. Nang, ngai makawp maga la na lit nan lu saga ai, a hpa a tang hkum myit ga-lu, sung sung tang tang she myit yu saga lu, hpawt hpra hpang hkrat mat yang, "Hkrap let pu shup" nga ai baw byin na yaw. Aten ahkying naw nga ai ten tha nang shoi nang sha n nga, hpu nau shada, mara raw dat hkat nna mani sum sai, shang lawt kan dang langai sha jawm hpai, nang grau, ngai grau n nga, hpyen hpyen pa pa rap rap ra ra, hkrap yang mung rau, kabu yang mung rau rai ra nga saga ai le i? Kaji ai wa hpe dun, kaba ai wa hpe shangun, shawng lam lahkam sit, shing dim ahpang yawng hpe dun ahkyit, n du n mai, shanglawt ban dung de sit shanang sa wa ra nga saga ai le i?

Um... Moi ji wa ni laili laika n chye tim, myit marai atsam shaw, shada tsawra n-gaw, shawng, hpang, sum ru, htawm hpang nga pra sa wa na, kashu kasha ni a matu, mungdan lamu ga n lu nmai, sin praw, sin na, masem, kaja grau ai gin ra de htim, sai asak hpe n lahpawt, mungdan hpe n lu n mai tam masat da ya sai n rai ni? Mai gan hpyen hpe adawt, kata hpyen hpe shagrawt, kaja reng grau ai, lamu ga hpe sai asak hte magyi, magaw, jut shing naw, krau nna masat da ya ai chyeju ni wa! an hpu nau ni n shakawn ai nga lu na a ni? Goi....... she myit yu, sum ru yu ga le! N law la ai amyu rai ga ti mung, ji wa ni wa......Mung kan pin ra, amyu baw sang, yawng a ningtsa........dawng hkawn sum ri ren...........gajai, gumhkawng ai gaw len talen..........Myi mut shan hpraw ni pyi.......... n shagrau ai n nga ngut......... dazik soi pya, dakhkama sum la, sin da she n shang, ahkrep shakap ya lai wa masai n rai ni.........

Oh........Manu dan la ai, wunpawng Kachin shayi, shadang, ja tawng, seng tawng, ahpraw, ahkyeng, ahtoi amyin kabrim tsawm ai, brang lawt, brang ram, hkawn tung, saugye, anu abawk, hkawn ji, hkawn hpa ni e........Hkum mau nga sa! alik laika jan mau mung lu.....shing gan hpaji mahkrum madup mung hkru, lagaw la hpan kaw sha yu, "n ta hkin gau" n htawng, "nga hkang hkalawk" na shu tek reng gaw, n mai na sai. Mung kan dam ai mung yu saga! Moi gaw, mungkan din ai da!.... ya gaw mung kan n dai pa mat sai hpe mung dum ram na saga ai. Na a tsawmhtap, nga mai lam sha hkum yu nga... shut na lu........ji wa ni gyip gyeng myit n rawng, hpyen hpyen pa pa aru asai, de du, de shang, galu kaba na sha yu ai hpe dum ra ai lu.... Chyau myen magyi ka ni hpe moi kaw na mung n chyoi......ya mung n manoi chyasam shari ran.....Tai hpyen majing ngu nan masat garan kau ra, moi mung n hku.....ya mung n hku........Magyi magaw, "Ri tum" myit rawng ai, "sa wa" a hpyen ni hpe, anhte amyu sha ni a chyaidung ginra kaw na, atsai awai gawt shapraw shamyit kau ra nga mali ai........Oh.... prat ram ramma ni e.........nang sai kaji ai amyu i? ru sai kaba ai amyu i? nang mayam amyu i? magam amyu i? tinang a mungdan, amyu sha ni hpe si si htan htan, zingri zingrat, roi sat, lamu ga yawng gashun la, kam ai hku amya shaw sha htum wa nga ai, chyahkawn sharaw ni hpe naw yu nga na n ni?......Lapu sat ai zawn sat shamyit kau na....Ram ma shayi shadang ni a lit wa n re ni?....N-gwi sai ngu?......gwi yang gaw, sa rit le!....Hpawng chyawm gaw le! ga hkyin gumdin ga le! ya ya nang hpe sha, la nga ga ai le! U.K.A ngu ai wunpawng jinghpaw mungdan shanglawt n lu ding sa......Lanu, Lahpa n hting nut, shawng de chyip chyap adawt sit sharu kau na hpyen dap kaw na tau la nga ga ai.

Oh.... Ram ma, manaw manang ni e.anhte a mungdan anhte hte sha seng ai n rai ni? Chyau Myen magyi ka ni......anhte a mung dan hpe shanyen dip gashun up tawn nna, na a kanu, kana, kajan ni hpe kam ai hku, na a man kaw roi sat, kumhpa bai jaw, tawng ban masu re lam ni gaw, "Na a baw" n tsa kaw" Hkyi nyi" sum pum ya ai hte bung ai n rai i?....... Nang hkam lu n ni?Hkam lu yang gaw, ning jan, ning nu ni hpe mung naw sa dun ya u le! Oi.....tsep kawp n hkam lu ai rai yang, "Mu hkrup ai" hpun tawng, hpun la, n htu, ning pa hte tim htim a byen bang wa saga le! Oh....ya gaw, n htim nmai, n sat yang nan n jaw, sat nan sat shamyit kau ra nga saga ai. Aten lai wa nga ai. Sut gan htum wa magang sai. Amyu mung htum mat magang wa nga sai. Nang gaw i mu nga n ni? Tai hpyen magyi ka ni a yaw masing anhte amyu a ntsa e law la nga ai hpe mu tawn n na ning hkap gasat ra ai, hpyen gaw, hpan mi sha n rai nga ai.

Oh... Ram ma, manang ni e, mu ga lu, yu ga lu, hpawt ni gaw aten n nga na sai lu. Ya ju a hkyeng galaw ra sai lu. Ya gaw, anhte amyu shani hpe ka-ni ya shatai, myo ga shara shagu hta kade dut tim n rim, yu tawn, lawu ga na AIDS- HIV kap ai hpyen du hpyen la, mung masha law law hpe anhte a mung de, dat bang, shayi num sha ni hpe shakap ya, gumhpraw law law jaw nna mari shakap ya nga masai. Amyu shayi ni AIDS – HIV kap ai law law rai sai. Htung hking, arawn alai, bu hpun sum li ai hku mung, aga sum tu hku nna mung, ga myet, kaup wa sai. Hpaji hparat hku nna mung kamyet up wa sai. Dai ni anhte a mungdan kaw, amyu sha ni jawng up kade nga a ni? Asuya mu gun, ningbaw kade nga a ni? dik htum &yfuGuf lawk salang pyi n nga sai n rai ni? Nang gara kaw pyaw lu na. ahkaw ahkang gara kaw lu na. Mayam amyu tai mat sai gaw, dum nga nni? Tara agyi gaw kadai, daw dan salang gaw, kadai rai nga a ni? Rung shagu hta kadai ni wa rai nga a ni? Nang, ngai, shara shagu a sum jaw ra sai n rai ni? Nang ram ma wa lu hkam nga n ni? Mu sani? Chye sa ni? Adawt kau na i? Tawn da na i? Atsai a wai gawt kau na gaw, ram ma ni a lit majing rai nga sai n rai ni?

Oh.... Ram ma ni e myit hkum garan nga masa! Dai ni anhte amyu sha ni hta uphung uhpawng grai law nga ai. K.D.A hpung, N.D.A(K) hpung, La sang awng hpung, K.I.O hpung, yawng gaw, amyu a matu shakut ai hpung ni hkrai re. Yawng gaw, n kaja ai hpung n lawm ai. Hpung shagu na ram ma ni a lit gaw, uhpung langai sha byin hkra bai gahkyin na lit majing nga ai. Ningbaw ning la yawng hpe hkrum lu hkra jahkrum bawng ban mu. N hkrum hkraw ai hpung gaw, amyu sha ni a hpyen re. Kadai hpung hpe mung n lu jahkrum jang, hpung shagu na ram ma ni hpung langai sha, tai lu na matu U.K.A United Kachin Land Army ngu ai hpung hta yawng kahkyin wa marit, tsep kawp hpung garan ai myit jasat hkum rawng nga. Mungdan hte amyu sha ni shanglawt lu na she ahkyak nga sai hpe dum u. Ayai nga ai pali shabawn gaw, gang daw na loi nga ai. Shabawn hkak hkak re ai pali shabawn gaw, daw na n loi ai hpe mung naw dum ga! Awng dang na n pawt gaw, anhte myu sha ni "shabawn" langai sha tai ai shani she lu na ga ai. Tai hpyen wa gaw, amyu sha ni ga garan magang ra magang, hpung mi hpe amyu mi hku manai, shada grau grau tsan gang hkra galaw nga ai hpe dum ra sai. Anhte a hpung she grau ai, waw ra hpung gaw n byin ai hkum sa myit nga, yawng hte gaw, hkrat sum n hpang ni sha re.

Oh... Ram ma manang ni e... Mungkan n tsa hta amyu hte mungdan sha ni shanglawt lu hkra woi shatsap lu ai hpung sha, kaja reng ai hpung rai na re. Dai uhpung hpe "Gaw sharawt" shatsap na gaw, Ram ma ni a lit majing rai na ga ai. Dai ni K.N.O- U.K.A ngu ai hpaw dat ai gaw, Ram ma ni a matu gahkyin gumdin shara rai u-ga! ngu ai, shatawng shada lam she re. Dai shara kaw salang mau gawng ni sut lu nga mai lam sa tam na matu n re. Ningbaw ningla sa galaw sha na matu n re. Prat ram ai ram ma ni jawm gahkyin nna, ningbaw ningla shara la nna, dip sha hkrum nga ai, amyu sha ni hpe woi shalawt la lu na hpe myit mada kaba hte hpaw da ya ai she re. Ram ma ni du sa shajang nna, "amung sum du" dup mu, hpa-awn kaja sa tai mu. "Hkai ai" hte di sha mai ai n re. "Hkai" nna tu kaba kung dam wa jang she asi si wa, shaloi she di sha mai ai baw re majaw, myit galu kaba, magrau grang ai myit jasat hte sa hkai nna di sha mu, anhte kaba ai ni gaw, prat ram ai Ram ma ni a matu "N hpan" sa kum da ya, hkai shara masat da ya ai sha re hpe kam mu. Anhte a myu sha labau, mung kan hta dan dawng lu hkra maka ka da na gaw, nanhte tsaw ra ai, myu hte mung dan a share ninghkring Ram ma ni a ta kaw, tsep kawp kam kaba ap da sai re.

Oh... Ram ma manaw manang hpu nau ni e......Ngai Pukdun hkra u gaw, matsaw ning tsa na yu dat yang, anhte a tsawm htap ai lamu ga ni hpe Tai Hpyen "Banau" ni gaw, "achyen achya" gare daw la nna, shanhte a lamu ga de shakap la mat wa nga, shajang ai gaw, mu nga n ni? Myit dik myitpyaw shara gaw, rai nga a ni? Sawn sum ru yu ga! Moi gatsa hkin dang ngu ai uom ga kaw na rai nga ai. Ya gaw, "Ga Du ga" de sit kau nga sai. Moi gaw "singling hkan ti" kaw na Gala mung htep re le! Ya gaw, Hugawng pa danai hka masawn, "Lidu" lam pyi n lawm mat wa sai n rai ni? Nang, ngai kaning di na!

Lung Seng Maw mung, moi gaw buga masha gai daw, gai da shing kra, wa la, matsan mayan masha yawng e, kam ai hku htu manaw sha nna, kan bau, hkru sha shajang, ai n rai ni? Ya gaw, "San Teng", shang hkawp" ja hkrat shara pyi n mu sai n rai ni? a bum gaw hkaraw, hkaraw gaw a bum, "U ru hka" mung matsat shabat, hkanu ai ding yang, shalau amya kau, reng la ai" Seng Hka Lung" mung tsai htum, nang, ngai hpe jaw da ai sut gan ya kanang kaw, yawn mau yu ga le! Ajak maw daw pyi n lu ai amyu sha ni a lamu ga wa, ya gaw, "a jak maw daw hte di" mai gan wa htu sha kau ma, n ra sha ngam mat sai! nang ngai, kaning di na!

Aja nga yang mung, Hkashi hka wam, lahput pyi n sung ai shara hkan aja gaw, mau hpa atawng apa hpring ai mung tsai htum, mali hka, n mai hka, hkrang hka, htara hka, jing ma hka, hpung ing hka yawng, shani hte shana n hkring n sa, ajak n sen gadu ai sha, she na mat sai. N htum hpa ka n nga sai. Buga madu ni moi prat kaw na "Ang lau hku wawn" hkai, hka kau hkan ahkut mahkawng gayin la tim, lani mi gaw, ahti, amu, apye lu, dai hte kan hkru nga ga ai le! ya gaw, ang lau hpai gayin hkawm tim, ngai mari da ai lamu ga, hkum sa htu, hkum sa wam, ngu shachyut kau ai she hkrum sai le! Nang myit pyaw nga n ni?

Hpun maling mung, miwa lauban ni hpe dut sha kau ma, moi chyaloi n hkoi na nga wa ai, buga madu ni gaw, n ta galaw na shadaw ngau ni pyi kanang n la, "ning wa" hpai shadaw sa kran yang mung, chyasam masha she lamu ga madu mat, ndai maling ngai mari da sai, hpun langai mung hkum sa kran bai nga, taw kaning di na! Moi gaw hpun nu, hpun gam hkran nna, akri adang ga hpyen la n na, "Shadaw la, daw sha" la nna shaning 30, 40 ning hkam ai n ta she gap rawng, n ta ngau hkang ai mung, bum de na "ri gawng" la, kawa pali pyi n lang, bai, ya gaw, "Ri gawng" mung n mai, madu hkrai hkrai, nang gara hku myit lu nga n ta?

Maling mala, kawng jinghkang yawng krin ma, manu dan ai, nam du sat magwi, hpaw lam, dun dum bau, sharaw, zau myi, shan nga, shan krang ya kanang, bat pyi n manam mat sai le! mau yu ga! Hpun ru, hpun raw, tsam htum sharut n gam gyi dik dik, manu dan ai tsi ru, tsi pawt mung ru gyi htum, nam nga u tu, chyang ngau, u gum, u ra, u hkring, u ka la, u preng, u gam, u-gan, u kraw, u ri, u num ji mun joi pyen gashai, ngoi garu ai pyi n na mat wa ai gaw, mau hpa n rai ni? Moi gaw bum, marawn, shagu tsit lali, nam u ni wa, aten hte aten ngoi garu gashai pyaw la ai anhte a shagawng bum ga wa le! ya gaw katsi gatsang "si ai wa a mai dang" hpa she rai mat sai le! Hpu nau wa na a salum kaw kaning nga hkam sha nga n ta?

Moi gaw, hka shi hka wam hka kau gret hkawm wa yang, myit ngwi myit pyaw, myit dik la nga ai. "a nga" ni wa nga rat, nga tsang, shalim, u hkyung, nga di, nga hpai, nga ju, nga htang, shari u la, hka tsu, chya hkan hka ting yan kanawng kahprim, prip la she kashoi, u bat, u hpe, palawn, ba luk, nga na, nga kawk, nga nyek ni wa nawng ting ting hpring, lagaw ja hkrat kabye shang wa yang, magyi lapran, bu hkrawng kata hkan she gazu yan shang wa, hkrit na zawn, hprawng na zawn she nga ai wa! ya gaw kade yawng htum sa!

Sharut n-gam gyi, ahka maw ru, hkrai ru, hkum pup, hkum pa hka hkrai kanawng, n si htum yang, kade yawng na! sum hkrai sum, htum hkrai htum, hkrap na kun? mani na kun? nga n ngut sang la! magyi magaw wum tsawm ai hpun mung tsin yam hkrum sai. Hka hku u ma shagawng bum ga ting a manip chyai dung gin ra, sari sadang hte hpring, nam pu, nam pan, htoi hkyeng, abya noi goi wat, mawn sum li, shing nip shana kaja jaw ai hpun ni wa, miwa ni e, "Wa madai pan" pawt nawng manu jahpu loi loi jaw masu nna mari, anhte bum ga masha gaw, gumhpraw shang lam hpa n nga mat jang gaw, kate mi lu lu hpun hpe n lahpawt atsai awai kran sharu kau, lamu ga mung krin, nam pu nam pan mung htum, buga a sari sadang mung sum sai n rai ni?

Oh... Tsaw ra n ja ai, Ram ma manaw manang ni e....Hpawt hpra ri lu yaw. Na a kanu, kana, kajan ni hpe na a man e.....Tai Hpyen wa gaw, shani shana kam ai ten roi, shanhte a roi n shat shatai kau chyalu yaw. Moi na mawn, lung tung, "lung zang" ngu ai mare kaw, tai hpyen ni gaw, mare masha 40 tup hpe rim tawn nna, la ni hpe yan mi, num ni hpe yan mi, man hkrum shatsap tawn nna, labu palawng yawng raw kau shangun, dung shangun, tsap shangun, shada da yu shangun, di nna shanhte a man e num ni hpe roi dan, hpang e gaw, yawng hpe gap garai sat kau di ai ni hpe yu yang, grai myit n –gut hpa re yaw. Nang dai ni ya aten hpe shalai kau yang gaw, amyu sha ni hta grau nna tsin yam jat wa na hpe loi mung malap n mai na re. Ta tut myu hkye dap de lawan du shang wa na myit shajin nu.

Oh.. mung hpe tsaw, myu hpe tsaw ai, amyu shayi shadang, nu, wa, hpu nau ni e....Kanu mungdan hpe kau da mai gan mung dan hkan nga pra hkawm ai ni e.... atsawm myit yu ga oi.....nang gara kaw mi nga nga, wunpawng sai gaw, wunpawng sai sha rai na ndai oi.........Amyen ga ga, amyen ni a mungdan de myi machyu nga lawt hkawm tim, lani mi gaw, myi prwi pru na sha re yaw. Sai shan gaw, amyen sai shan n tai na re oi........"La kum si gaw, lakum n hpang" kaw she hkrat na oi.....katsi tim rau, kahtet tim rau rai yang chyu lawt na hpe dum ga oi........ Myit malai hpang hkrat na n dai lu! n ta gap n lawm yang ri yup gawk kase na mung dum ga lu...Gara mung ga mi du du, amyu hpe dum, mung dan hpe dum, ang ai daram amyu a matu shang lawm na hkum malap ga lu oi......Anyan hpaji hte mung, aja gumhpraw hte mung, byin ai daram hte hkum lawm, myit lawm hte gun hpai lawm ra na lit nga ai hpe mung dum ga oi.......Tinang a lawt lam sha gaw, n tam ga! Fountain ball pen kaw na, sanat hpai hka de apnawng na gaw, loi ai bungli gaw, n re. Raitim, ji wa ni a hkring htawng mung dan hpe n ja yang gaw, hpa yak na lam gaw, n nga na re. Mungdan langai dai daw la na gaw, yawng a n-gun, atsam gum hpawn yang she padang dip la lu na ga ai. "sha sha nga yang woi nawng hkrum, galaw galaw nga yang ngai hkrai chyum" nga ai baw gaw, loi mung n mai byin na re. Ngai n lawm n mai ngu ai gaw lawm ra na ga ai oi..........

Oh... tsaw ra ai, Hpu shawng, hpu ba, nau na ni e... Shanglawt lam yan hpe loi mi n htang yu dat ga i? Ngai gaw 1961, July 7 ya kaw na shanglawt mu gun hpyen la tai wa sai. yu yu u, 1961 ning kaw na 1975 ning du hkra G.O.C. Zau Seng woi ningbaw ai K.I.O – K.I.A gaw, wunpawng mungdan grup, uphkang dap, Army hpyen dap, V.D.F (or) L.G.F. dap hpe ra n rawng 1961-1963, ning laman atsawm sha, sharawt gaw, shachyaw da sai. Dai aten hta wunpawng myu sha ni a shanglawt asuya gaw, ahkaw ahkang, hpring tup lu ai ten rai sai. Tai hpyen ni hpe anhte a mungdan kaw na, gawt shale kau na sha ra sai. Dai hpe tsep kawp gawt shale kau na, hpyen masing kaba shaw nga ai ten hta ningbaw kaba yan nau ni hpe sat sharu kau dat ai majaw, tai hpyen ni hpe gasat shagrawt nga ai majan gaw, dai kaw hkring mat ai re. G.O.C. Zau Seng, V.C.S. Zau Tu, G. S.O. Zau Dan G. Secretary Pung Shwi Zau Seng ndai ni woi ningbaw nga ai ten tha shanglawt K.I.O- K.I.A gaw, n gun ja htum, myit hkrum dik ai ten, shanglawt n lu n mai ngu ai Ban dung de ding yang sa wa ai ten rai sai. Moi na magam gun ding sa ni yawng hpe san yu ga. re she nga na re. Ningbaw ni yawng, mung shawa a akyu hkrai galaw ai ten re. Ting gyeng nga mai lam tsep kawp n tam ai, mayun kumhpa kadai n sha ai. Lu ang ai gumhpraw yawng, gumhpraw dum Treasury kaw tsep kawp shang ai. Ningbaw ni a sum bu kaw gumhpraw lap myi mung n rawng ai. Mung shawa hta si poi, hkung ran poi zawn re hkan garum ra wa yang, seng ang ai gumhpraw rung account kaw na gumhpraw shaw jai hkrang hte hkrak Ks. 1500/- (sh) Ks. 2000/- shaw la nna she sa garum ai hpe mu ai. Shanhte a palawng sumbu kaw gumhpraw n rawng ai majaw, mungdan ting a sum bu kaw gumhpraw rawng ai. Magam bungli mung awng dang htum sai.

Dai aten hta mungdan ting na shang ang ai bumhpraw ahkun hkan se yawng tsep kawp hta shing gyin la lu ai. Lung seng maw, seng htu lakmat kaw na, seng kyem lakmat, dut sha lakmat, n hkum lakmat, htu lak mat, maw kabye lakmat, gat dut lung lakmat, lung seng htaw lakmat, gate kaw yawng tsep kawp hta lu ai. "Hpakant lam, Hupin lam" kaw lani mi hta la lu ai gaw, yawm dik sen 28 daram hta lu ai.

Myo, mare, kahtawng shagu na hta ang ai hpyen garum gumhpraw "war fund, donation, yawng hta lu ai. Myo kata na myen, sam, gala, miwa yawng kaw na mung n shut n shai hta la lu ai. Myo kaw na shing gan pru jang war fund lakmat madun nna she lung seng maw, ja maw gara de mung sa lu ai. Myen mu gun ai ni mung sa lagu bang ai. Hpa majaw nga yang, shing gan de tam sha ra ai majaw rai nga ai.

Bai amu kaji kaba tara je yang, daw dan hparan ra ai amu ni mung shanglawt rung de she sa tsun, sa shawk ai. Shanglawt asuya gaw, mayun kumhpa n sha ai. Teng man ai hku hkrak daw dan hparan ya ai nga nna grai kam manoi lai wa masai. Dai hpang gaw, Myen ni hte maren sha re ngu kau sai.

Moi na ningbaw, ningla ni hpe sat sharu kau ai hpang kaw na gaw, gara hku mungdan uphkang na, gara hku majan gasat na ngu ai Hpyen lam, uphkang lam hta dam abram mat sai. Shanglawt a ban dung mung shamat kau masai. Mung shawa hpe organization galaw ai mung, masu, male rai mat sai. Mung masha ni mung, shanhte a masu organization mung, n kam madat mat sai. Jahtum, dai ni du hkra gara hku sa wa na ngu ai, mung masha shawa hpe tara hkaw, organization galaw ai mung n na yu sai. Dai gaw lam dam mat ai n rai yang, hpa rai na. "Magwi myi di" a lam hkawm, [kwfvdrfhEdk;Edk; qifuef;awmwdk; ngu ai byin mat sai.

De a ningpawt hpe tam gawn yu ga! nga yang, lam n chye tam mat ai majaw, mung shawa hpe "majan chying htawng" nau ren sai, "sim sa lam ceasefire" she la ga, shing rai mung dan hpe gaw sharawt ga, nga wa sai. Dai gaw shut kaba rai sai. Dai hku rai yang rawt malan n ra ai gaw, masha mung n si ra ai gaw, "Wunpawng Mungdan Shanglawt" lu ai hpang she " Gaw sharawt" ga ngu ai she re gaw, shang lawt n lu ai ten gaw sharawt ngu ai gaw, moi na zawn mayam bai tai ga ngu ai sha re, dai kaw nan n htang mat sai. Dai majaw hkrat sum n hpang nan pru mat sai. Sim sa nga ai hte majan n gasat ra sai. Hpa bungli mung n nga sai. Du kaba, salang kaba ni yawng gaw, sum bu bawng na sha gyam hkawm wa sai. Lawu na magam gun ni mung ang ai kaw amya sha na sha gyam tam, "la nyau a yu" masem rai shajang sai. Magam dap n hten yang, hpa hten na. Mungdan n hten yang, hpa hten na. Sim sa lam la ai majaw mung dan hte amyu masha yawng gaw, "hkum pup nawng kaw, chyat ai, yu chya yat" hpa rai mat sai. N re ngu kadai tsun lu na. Moi gaw lung seng lauban ngu Jinghpaw Wunpawng sha ni kaji kaba grai nga sai le! ja gumhpraw mung, myo, mare, kahtawng shagu lauban ni jai ayai jaw, gum gai, ding la, mahkawn, shabrang gumhpraw yawng lu lang sai le! Ya gaw kanang kaw, num sha ni mung, tsawm hpa gaw ra, kaning gaw n di, hkum dut sha kaw chyaw! "ana yaw ga" gaw magawn bang dik dik, amyu n htum ai kade yawng na. Sim sa lam a akyu dum ga oi.... aja, lung seng maw, hpun maling htum ai mung, sim sa lam a akyu.... mayam prat de nep myi prwi hte bai du wa ai mung, sim sa lam a akyu........Jinghpaw Wunpawng sha ni amyu hte mungdan a matu magam gun na ni hpe mung kan, mungdan shagu de sha prang kau ai mung, sim sa lam a akyu.... Gaw rai nga ai kun? Mung dan ngu ai gaw, sanat laknak hte gasat di la ai baw she re. "Fountain, ball pen hte tsa boi" n tsa kaw hpyi la na ngu ai gaw, mau hpa, Jinghpaw Wunpawng myu sha ni shanglawt lu ra ai majaw, "du baw" hkying, mun, hkrat sai. Mung dan ting a "sut gan gin lut" kau sai. "amyi baw ai gaw baw, lagaw lata daw ai gaw daw" tsin yam grai hkrum sai. malap n mai ai myu sha ni a labau nan rai nga mali ai.

Dai majaw sim sa lam hpe tsep kawp tawn kau ra sai. Moi kaw na, "Mungdan shanglawt n lu ding sa, prat hte prat, ban hte ban gasat sa wa na ngu maw hke" hka tawn ai re. Wunpawng myu sha ni e dum ga. Myen amyu ni anhte hpe hpa ahkaw ahkang jaw na mung n re. Mung daw ngu ai pyi yu yu ga kade n na yang dawm kau nna "Division-Taing" ngu ai hte up sha kau na mara ai. Dum ga ngai "Pukdun hkra u" a gum hpan ga re yaw.

Dai ni na hpung shagu na myit su ningbaw ningla ni e.....atsawm she myit yu ga! htawm hpang na anhte a kashu kasha ni hpe si n hkun kaw sha gaw, n kanawng bang da ga yaw. Nang dai hku di da yang gaw, ram ma ni, kaji nga ai ni dum hprang wa ai shani nanhte a "tsu n hkum lup" du hkra htu alai ayai kau ai hkrum na oi... Tinang a kashu kasha ni hpe kaya ja hkrum da ai hkoi tai na myit dai kun? Sung sung myit yu mu. ya aten naw nga nga ai, n byin yang mung n byin ai ngu, n chye yang mung n chye ai ngu, shara lawan yen, gahpa lawan lai kau da yang chyawm gaw, arawng naw lu na re.

Dai ni anhte K.N.O. gaw, moi na lam woi G.O.C. Zau Seng, V.C.S. Zau Tu, G.S.O Zau Dan, G.S. Pung shwi Zau Seng ni a lam yan tup hkrak, Jinghpaw Wunpawng myu sha ni shanglawt n lu ding sa gasat sa wa na ga ai ngu ai, "Ga sadi" hte maren matut gasat sa wa na ga ai. Dai gaw K.N.O. a ban dung majing rai sai.