2010 ning, August shata 16 ya shani hta KNO Ningbaw Duwa Bawmwang La Raw woi awn let, India mungdan, New Delhi myo kaba hta India mungdan nga let Myen mungdan Democracy lu na matu shakut shaja nga ai Uhpung Uhpawng ni the “ Ya yang Myen hpyen asuya ni galaw mat wa na ra lata poi hte seng nna gara hku jawm galaw sa wa na lam hte jet ai federal munghkawm myen mungdan byin tai wa lu na matu shawng de gara hku bungli masing jahkrat galaw sa mat wa na” lam hte seng nna du sa ai Du, Salang ni hte bawng ban jahkrup ai lam hpe galaw da lu sai.
Zuphpawng lamang hpe Major Khaing Myo Min kaw nna woi galaw ai.
Bawngban Jahkrup mat wa ai ga baw kaba (2):
1) SPDC ni galaw ai ra lata poi hte seng ai lam.
2) Jet ai Federal munghkawm myen mungdan byin tai wa lu hkra, Matut galaw sa ra ai shawnglam masing .
Lahta na ga baw/ ginlam hte seng nna KNO Ningbaw Duwa Bawmwang La Raw kaw nna shawng nnan ga hpaw sang lang dan ai lam hpe galaw ai.
Dai hpang du sa ai amyu bawsang Du, Salang ni hku nna bawng ban jahkrup sa wa ai lam hpe matut manoi galaw wa sai. Shani 1:30 pm hta shat sha hkring sa la nna shana maga de hkying 3:00 pm hta zuphpawng hpe bai matut galaw lu sai.
Shana maga daw de na zuphpawng hta gaw jahpawt daw de bawngban ai lam ni hpe tatut masing hku nna galaw sa mat wa na lam hte seng nna bawngban lu sai.
Dai hta bawngban jahkrup nna myit hkrum ndau laika hte masat masa letmat hpe ta masat galaw da ai lam hpe galaw ai.
1) Ya yang Myen hpyen Asuya hku nna galaw na, 2010 ra lata poi hpe lam tam nna ja ja matut ninghkap mat wa na.
2) 1990 ra lata poi a mahtai gaw Myen hpyen Asuya hpe ninghkap/ gasat nga ai Munghpawm Amyu sha ni yawng a mahtai mung re ai majaw matut nna madi shadaw mat wa na.
3) Jet ai Federal munghkawm mungdan byin lu hkra galaw sa mat wa-ai lam hta amyu bawsang shagu,mungchying mungshawa yawng myit hkrum let shang lawm sa-wa na.Mungchying mungshawa yawng hpe woi awn sa- wa lu ai wuhpung langai mi hpaw shabawn la na. dai wuhpung kaw nna , jet ai federal munghkawm myen mungdan byin wa hkra galaw sa-wa na.
4) Myen hpyen Asuya a 2008ning hta` gaw da ai tara gaw Munghpawm Amyu baw sang yawng a akyu ara lu na matu nre ai,mung shawa hpe shim lam mung njaw lu ai hta sha- n -ga, hpyen Asuya ra ai lam hte shanhte matut grin nga lu na matu yaw shada ai lam sha re ai lam hpe mungshawa yawng hpe tsun shabra wa-na.dai majaw akyu n rawng ai SPDC a ra lata poi hta` mungshawa yawng gaw, lahkrip ra ra ninghkap sa wa na.
Zuphpawng hpe shana maga de hkying 6:30 pm hta awng dang ai the shangut shakre la lu sai.
