(June 30: London) Dai ni hkying 14.30 hta, Jinghpaw Wunpawng Amyu Sha Hpung na salang Hkanhpa Tu, Salang Hkun Htoi hte Salang Lachyung Ring Du ni gaw, dai ni byin nga ai Jinghpaw Wunpawng Mungdan na masa lam ni hpe U.K mungdan na maigan makyit mahkai ginjaw rung (Foreign and Commonwealth Office- FCO) hta wa tang madun lai wa sai. Ndai lamang hta anhte amyu sha ni a jinghku kaba, Maran Brang Shawng (Benedict Rogers- South East Asia Team Leader), Christian Solidarity Worldwide na sinpraw hkran lithkam wa kaw nna woi lajang sa wa sai.

Ndai hkrum bawngban tang shawn ai lamang hta, anhte amyu ni a matu lam madung, lam yan 4 hpe tang shawn lai wa sai. Dai ginlam lam ni gaw;

(1). UK asuya kaw nna tsinyam masa maram masha dat ya na lam.

(2). Tsin yam hkrum hkra nga ai anhte amyu sha ni hpe lawan ai hku garum ningtum jaw ya na lam.

(3). Myen asuya kaw nna, mungdan ting na laknak lang myu bawsang yawng hte simsa lam (nationwide ceasefire) hpe galaw na matu, U.K asuya kaw nna shadut, lajang ya na.

(4). Myen hpyendap kaw nna mung shawa ntsa tawt lai ai, sat nat roi rip ai lam ni hpe mungkan tara hte maren je yang ai (Crimes Against Humanity- Commission of Enquiry) hpe madi shadaw sa wa na lam ni hpe tang shawn lai wa sai.

Hkying hkum mi jan na ai ndai tang shawn zuphpawng hta, Myen mung a lam hpe litla nga ai U.K mungdan na maigan mungdan kyit hkai magam gun salang ni (FCO Burma Desk), Myen mung a lam hpe jum ai matsan jam jau ai mungdan garum ningtum dap (Department for International Development-DFID) magam gun ni shang lawm lai wa sai. 

U.K asuya kaw nna Jinghpaw Wunpawng Mungdan hta byin nga ai lam ni hpe yu maram nga let, ra ai lam ni hpe ladat amyu myu hte garum sa wa na lam, matut nna shanhte Asuya kaw nna lu garum sa wa lu na matu, shani shagu na anhte mungdan a masa lam ni hpe matut mahkai shana ya na hpe bawng ban sai.