August 13, 2009

Myenmung a mungmasa manghkang hte seng nna aten law law zim nga ai Gala asuya gaw lagaw lahkam langai hku nna mungmasa lam galai shai ai lam hpe galaw sa wa na matu myen asuya hpe shadut dat sai.
 
Aung San Suu Kyi hpe shata 18 n’ta hta matut sharen da na matu ari jahkrat dat ai hpang Gala asuya a sharawng ai lam hpe maigan hkring mang dap kaw na ndau shana wa sai re.
 
“Myen asuya hku nna mungdan kata simsa lam hpe galaw na hte mungmasa myit jasat ni hpe lawan ai hku galai shai na matu ra nga ai hpe Gala asuya gaw madung da tsun shaga mayu ai. Ya yang na mabyin ni gaw Myen asuya a matu simsa lam hte ninghtang shai nga ai. Mung masa bawng masha ni hpe dat ya ai lam gaw simsa ai lam a matu ahkyak ai lam re” nga nna Maigan Hkring Mang Dap kaw na, tsun shaga ahkang nga ai wa gaw August 11 ya shani na Maigan Hkring Mang Dap Internet shiga hta tsun da ma ai.
 
Aung San Suu Kyi hpe aming rai n jahkrat shi ai shani hta myenmung lam hpe myit shang sha ai lahta tsang na amat ni, tara hte seng ai salang ni gaw India rapdaw zuphpawng ni hta myenmung n’tsa India asuya a policy hpe tang madun na matu tsun shaga ai lam ni galaw wa sai.
 
Myenmung hte seng nna jahta lai wa sai India lahta tsang rapdaw amat hte ginjaw tara rung tara kasa “Ram Jethmalani” gaw “India asuya gaw ndai hta sha n ga tang du ai hku grau grau galaw mai hkra anhte matut nna sadut ra na re, ya yang ten hta rapdaw hta myenmung hte seng ai ga baw ni hpe jahta wa masai, gara hku galaw na, hpa hpe galaw sa wa na ngu ai daw dan ai lam hpe gaw rai n hkrat wa shi ai” nga nna tsun ai.
 
Demokrisi n’gun kaba mungdan ni rai nga ai India hte American mungdan lahkawng sut masa, mung masa ni hpe arau jawm galaw nga ai aten ladaw hta India asuya hku nna Demokrisi hpe grau nna n’gun jaw galaw ging ai nga nna matut tsun ai.
 
Aung San Suu Kyi hpe tara rung kawn aming jahkrat ai hte seng nna shi gaw “myenmung asuya a galaw ai ladat gaw 1996 ning shinggyim ahkaw ahkang upadi hte mung n htan shai ai, 1948 Mungkan Wunpawng Hpung a shinggyim ahkaw ahkang ndau laika hte mung n htan shai ai, ngai hku nna Noble kumhpa shagrau da hkrum ai Aung San Suu Kyi a matu matsan dum ai, shi hpe ya na zawn galaw ai gaw kachyi mi mung lachyum n nga ai re” nga nna tsun wa ai.

India asuya gaw myen asuya hpe shadut tsun nga ai aten hta India du myenmung demokrisi wuhpung n’gun 100 jan mung New Delhi, myenmung hkring mang rung shawng hte Jan Ta Man Tal nampan sun shawng hta Aung San Suu Kyi hpe tara je yang ai hte seng nna ninghkap n gun madun ai lam ni mung galaw wa sai.
 
Ninghkap n’gun madun ai ni gaw myenmung hkring mang rung a wutdek wang n hpan hte chyinghka hkan e Aung San Suu Kyi sumla ni shakap nna “Free Aung San Suu Kyi” ngu ai laika ni hpe mung tsi hte mahkret ka nna n’gun madun ma ai.
 
Myenmung hkring mang rung shawng de wunhpung 2 garan nna n’gun madun sa wa ai hta rim ai lam n nga ai rai tim Inida pyada ni gaw masha n’gun marai 60 hpe htaw sa wa ai mawdaw zaw hpe zing da ya ai majaw n’gun madun ai ni n wa ai sha matut n’gun madun na matu shajin wa ai ten hta she mawdaw zaw hpe bai jaw nna wa na ahkang jaw ai. Myenmung hkring mang rung na lit nga ai ni gaw rung wang kata kaw nna sumla ni dem la ma ai lam chye lu ai.

Miwa mungdan asuya hku nna gaw myen hpyen ni a tara daw dan ai lam hpe hkungga jaw ra ai nga nna ndau shabra laika shapraw wa ma ai re.