August 5, 2009

March shata hta U.S kaw na Dingdung Korea de shiga sa la ai numsha lahkawng hpe Pyongyang kaw rim kau ya ai hte Dingdung Korea a nuclear hte seng nna mungkan ga daga a lapran shang tsun bawngban ai lam hpe nhkap la sai ngu nna ndau dat ai aten hta e gaw a kajawng sha Dingdung Korea de sa du ai lam chye lu ai.

Cliton gaw Pyongyang mare kaba hta August shata 4 ya shani du nna Dingdung Korea a asuya magam gun ni, Nuclear hpungtang hpaji ninghkring “Kim Kye Gwan” ni hte hkrum shakram wa sai lam mungdan shiga agency hta lakap let chye lu ai.

American asuya gaw shiga reporter lahkawng hpe mara raw dat ya na matu hpyi shawn ai aten hte, U.N kawn jahkrat tawn ai tara hpe tawt lai nna atsam ningja rawng ai pala pyen ni hpe gap chyam nga ai Nuclear a majaw masa lam kahtet nga ai aten ladaw hta e Bill Cliton  sa du ai rai nga ai.

Ningtau gumsan magam dingsa “Al Gore” a Current TV shiga dap a reporter yen rai nga ai “Ling hte Lee” gaw lai wa sai march shata hta shiga hkan sagawn let Miwa mung kaw na Dingdung Korea de tara n shang ai hku lagu shang wa sai majaw rim hkrum wa ai re. June shata hta bungli shaja hte htawng (12) ning hkrat na matu Dingdung Korea kawn ari jahkrat dat ai.

Clinton gaw Dingdung Korea de sa du ai hta (2) ngu na American mungdan a gumsan magam langai rai nga ai. Moi shawng na American gumsan magam “Jimmy Carter” gaw Pyongyang de 1994 ning hta sa du lai wa sai. Dai aten hta “Bill Clinton” gaw Gumsan Magam lit hpe gunhpai nga ai aten rai nna “Jimmy Carter gaw “Kim Jong II” a kawa ningbaw “Kim II Sung” hte hkrum shaga wa ai.

August 5 ya jahpawt aten hta Dingdung Korea ausya gaw rim da ai Amrican shiga num 2 hpe dat ya sai lam asuya a “KCNA” shiga dap kawn n dau wa sai. “Euna Lee hte Laura Ling” lawt wa ai gaw Bill Clinton hte Kim Jong II hkrum shaga ngut ai hpang aten kadun laman dat ya ai re.

Ya ten Ling hte Lee yen gaw Bill Clinton hte rau Dingdung Korea kaw nna nbung li hte pru mat wa sai rai nna American mungdan “Los Angeles” de du shang wa sana re lam chye lu ai.  AP