July 30, 2009

Afghanistan mungdan hta tawn da ai American hpyenla hte Britain hpyenla ni gaw hpyen majan a majaw hkala nba hkrum ai law wa ai majaw, mungshawa madi shadaw ai lam yawm wa ai raitim, hpyenla ni hpe matut nna tawn da mat wa na lam US hte Britain yen tsun wa ai.

“An gaw rau jawm galaw wa ai re, matut nna mung rau jawm galaw sa wa na re. Hpa majaw i nga yang, n-gun ja ai mung maren sha re ai majaw re” nga nna British Maigan Kyithkai Hkring Mang David Miliband gaw Hilary Chinton hte hkrum shaga ai shaloi tsun wa sai.

David Miliband tsun wa ai lam ni hpe kabu gara hkap tau la nngai nga na American Maigan Kyithkai Hkring Mai Ms. Hilary Clinton tsun wa ai.

“Matut nna shawng de galaw sa wa na lam hte seng nna David Miliband tsun maram mat wa ai lam gaw anhte hte grai myit hkrum ai, grai bung ai ga rai sai. Anhte a npawt yaw shada lam ni hpe shakut sa wa ai magam hta rau jawm tsap, gunhpai mat wa na re” nga nna Hilary Clinton tsun mat wa ai.

NATO ginjaw rung hta tsun shaga ai shaloi David Miliband gaw, Taliban hpyen ni hku nna Afghan asuya hte htingrai htingrat lam galaw sa wa na matu mung hpyi shawn mat wa ai.
2001 ning hta US woi awn nna US hte British ni gaw Afghanistan hpe shang gasat zing ma ai re. Dai hta US hpyenla 39 hte British hpyenla 22 hkrat sum mat wa ai. 2001 ning kaw nna US hte British ni gaw Afghan hta hpyenla jahkrat tawn da ai rai nna, July shata hta gaw hpang jahtum tawn da na matu masing jahkrat dawdan da ma ai.

Afghan kaw British hpyenla jahkrat da ai hte seng nna PM Gordon Brown hpe ninghka mung masa pati ni grai ninghkap tsun shaga wa ai lam grai law wa masai rai nga ai.

“Anhte a magam bungli hte seng nna British mung shawa ni rau rai nga na hpe kam ai, hpa majaw i nga yang, American a gawng malai hku nna adan sha masing jahkrat dawdan da ai lam nga ai majaw re. Kaga myitrum manang ni mung ndai lam hpe chye na na re hpe kam ai” nga nna David Miliband tsun mat wa ai. CNN