De,

Tsaw ra ai manang wa ngwi pyaw hkamja nga na hpe kam let ndai laika hte hkrum shaga dat ai..manang wa hte rau myit rum hpyen la manaw manang yawng ngwi pyaw nga mi ga ngu sumtsan shara mi kaw na  kyu hpyi dat ai yaw manang wa e…nmyit mada ai ndai lai ka du wa ai  majaw nang mung grai mau ai hte moi anhkau ni rau nga ten na lam ni hpe bai myit shing ran taw na sai ngu kam ai …ngai mung sum tsan mai gan e du hkawm taw nga ai shaning ten ni grai na mat wa sai rai tim ..lani mi mung wunpawng jing hpaw buga hte nanhte manang ni hpe myit dum shingran ai lam ni gaw  kachyi mung nyawm ai yaw...

Hkawm du mat wa ai mung dan ni a galu kaba nga  mu nga mai ai lam ..mung dan up hkang masa lam ..dai  mung dan ni a hpaji masa lam …sut masa lam …hkam ja lam..…ma ni hte myu shayi ni a ahkaw ahkang lam ..shingyim ahkaw ahkang lam ni hpe ngai nan hkum hkrum ta tut mu chye ai shaloi ….nye kraw hta nchye tsun hkra hkam sha nngai..jinghpaw wunpawng buga hte myu sha yawng hpe gara hku nna she lawt lu lam  tam na rai kun ?....ngu….myit kaw hta nchyi nmu she nga  wa nngai...

Moi anhkau ni myit mada shingran ai gaw jinghpaw wunpawng mung dan..kachin land hpe gaw gap ga nga ning baw ningla ni jasu sharawt ai kaw nang mung ngai mung shang lawt dap…de myu  tsaw brang ni ngu ai arawng sadang hte du shang wa saga ai re…shing bwi  matsun ..janghpan lap..kawa makru..laihkru…lai sii..sani si jap htu ni gaw
ngai  lani mi mung nlu malap ai si mai ni re…

Shingbwi sum kata  rawng hpunjum kaba wut tawn nna anhkau ni tsun jahta lai wa  ai jinghpaw wunpawng mung dan a shawng lam gamung ni hpe nang hkau naw myit dum nga ai kun gaw nchye sai..ngai gaw nang hkau hpe moi na hte maren naw rai nga na re ngu kam nngai  .  nang hkau mung arawng aya kaba Dap Ba up madang ginjaw madang de she rai mat wa sai majaw ..shani shana  hpun lawk hpyi manam ja maw hpyi ai manam ..ri lawk hpyi ai manam ni hte nrau nhtau rai nga ai kun? ..shing nrai manam ni gun sa ai beer kum hpa lu nna mani ha ha ..taw nga  ai kun …mi wa Tar gaw  ni a mayun kum hpa hta len nga ai kun ngu myit kahpra  nngai yaw…

Anhkau ni  chye na hkap la ai gaw rawt malan ten hta  tinggyeng akyu nmai tam ai..hpaga yum ga lam kachyi mi mung nmai ai..mayun kumhpa nmai sha ai..yawng gaw maren mara rai jam jau tim rau pyaw tim rau jing hpaw wun pawng mung dan shang lawt nlu ding sa ngu ai myit jasat hte nga  lai wa saga ai .jagum hpraw hte mayun kum hpa sha nna tara tawt lai ai ni hpe gara hku tara jeyang ai gaw anhkau mi npu kaw re .nang naw dum na kun nchye ai dap dung (6) maw committee rung na gyi jum langai hte anhkau ni a manang wa La Seng hpe nlaw la ai gum hpraw jahpan shut ai majaw lahkawng yan hpe sat kau ai le..an hte manang wa laseng gaw shi tsaw ra ai manang wa hpe shi  hpe gap sat shangun ai nye mi hta dai ni du hkra nmat taw nga ai hkau e…ka ni ya ka ni lu ai n hkan nga nna 1989 ning hta dap dung (6) kaw kani loi li gajam ai hpyen la ni hpe sat sharu kau ai mung ya du naw shing ran ai..nang chye ai hte maren B COY hte D COY na hpyen la ganoi she ma mat ai le..rai tim dai ni gaw K SHAGU   DU ni salang ni ka ni lu  license lu ma sai nga na lu ai...

Mayun kum hpa mung nang grau ngai grau ngu ai hku she rai sai da.ya gaw na lu ai shi ga ni gaw ndi nda  bai li bai la..na kaw pyi nshang hkra she rai taw nga sai le…lahta tsang du salang ni gaw Rolex .Nayi  she hkawn mat masai..shata pru ..du kahtawng mare kaba shara kaja hkan wutdek nta gap mawdaw kaja jawn ai ni gaw rawt malan ning baw ning la ni Du salang ni hkrai rai ma sai da,,, N DAK ..Du..KDA..Du ..KIA Du nga nna Du hkrai hkrai nkau gaw KDA hte NDAK kaw Du manu hpa ai majaw Du aya sa mari shakap la ai ni mung grai law ma ai nga na lu ai..shara shagu Du chyu nau law nna  Du.. Du.. Du ..Du nga she ngoi gara taw sai da ..rai tim Dai Du ni yawng gaw nta nhku na Du sha rai nna myen hpyen Du ni hpe ding yawm ai hkrai rai ma ai da yaw..ngai shadu ai gaw simsa lam la da sai majaw tinang jing hpaw myu sha  ni wa myen hpyen ni  hte gwi gwi rai nna jing hpaw wunpawng mung dan lu lam a matu n.gun dating mahkawng taw sam ma ai she ngu yang wa, myen hpyen Du ni hpe mahtang jing hpaw Du ni hku nna she mayun kum hpa shalai jaw nna hpaga yum ga lam tam nga ma ai da...

Arawng aya nlu jing hku jing yu nsu mayun kum hpa jaw hpa nnga ai mung shawa hte lung seng hpa ga la ni gaw lani hte lani grau grau nna she jam jau  wa nga sai... lung seng hpaga la ni a wut dek nta  ni mung rawt malan Du ni lata kaw she pawng shachyawp ma sai da... hkau e maga mi hku yu yang anhte Jing hpaw Du ni nga mu nga mai sut su wa ai hpe kabu nngai…rai tim myu sha hte mung dan hpe dut sha nna tinang tingyeng a matu sha rai yang gaw ya ten hta nga pyaw tim  htawm hpang labau hka ji wa ai shani yak na nhten... galaw ra hte galaw taw nga ai lam ni shai taw sai ngu mu mada ai hkau e.. myu sha  rawt malan hpung ni mung, K langai kaw na ya gaw K 6 de she du taw sai  da, gara K madaw she jing hpaw wun pawng myu sha ni hpe lam woi ning shawng  tai na kun nchye ai majaw mung sha wa gaw kadai kaw she hkan na kadai hpe she n,gun  jaw na  nchye mat masai da…

Hkau e..ndai grai tsang ra ai kum la re yaw..nang hkau gaw  gara masa lam kaw tsap nga ai kun ..myu sha yawng hpe mayam gale shamat kau na masa lam de rai wa nga ai ngu ngai hkau gaw myit tsang la nngai ... mung shawa yawn jang gaw anhkau ni dawgrawp mat na gaw aloi sha re hkau e,,, 1992 ning KIO ginjaw salang ni buga shagu de myen hte simsa lam la na campaign rawt ma ai..dai shaloi mung shawa salang nkau tsun ai myen hpe kam nmai ai..gaw rai na gaw re ni ? nga sim sa lam la na hpe grai tsang ai myit hte ginjaw salang ni hpe tsun shadum ma ai… dai ten na mung masa sat lawat gaw mung hpawm myen mung ting grai kasu kabrawng myit rawt nga ai ten mung re… aga  mi kaw 1990 ning kaw ralata dang da ai NLD  hte UNLD kaw na mung shawa dat kasa ni lawm ai  MUNG BAWNG ZUP HPAWNG (NATIONAL CONVENTION) galaw nga sai re majaw mung hpawm myen mung dan a masa lam gaw galai shai wa mai ai ten ladaw re...

Ndai zawn re masa lam yan hpe mu ai majaw tinang KIO ning baw ning la ni hku nna 1994 ning hta gap hkat jahkring nna sim sa lam la ai gaw shut ai ngu ngai ntsun mayu ai... aten ladaw masa lam hta hkan nna galaw ra ai  sat lawat (situation) rai taw nga sai  re majaw KIO ning baw kaba hte ginjaw salang ni daw dan galaw ai lam rai  na sai ngu kam ai... rai tim 1996 kaw national convention kaw myen hpyen ni kam mara shan hte ra ai hkrang hpe sha madung dat galaw wa ai majaw teng man hte democracy lai hpe ra sharawng ai mung shawa ra lata dat kasa law malawng gaw dai mung bawng zuphpawng national convention kaw na le mat wa sai majaw mung bawng zup hpawng hten bya mat sai re… ndai zawn re masa lam ni pru wa ai ten hta ting nang myu sha rawt malan yawng gaw dum chye ra sai rai tim matut nna myen hte bai shangang shakang ai lam ni matut galaw ai gaw shut kaba re...

Myen hpyen ni hte myit kyi na kaw rung dung nna mung masa ginsup shing jawng (political play role) rai nlu galaw yang ning baw kaba Brang Seng nnga mat ai mung anhte jing hpaw wunpawng yawng a sum machyi kaba rai mat sai... lama myen ni hte shat sha poi rau nsha ai rai yang dai ni ning baw kaba Brang Seng mung asak naw hkrung nga na kam ai... hte maren Dukaba Seng hpung mung myen hte shat rau sha ai hpang machyi si mat ai re... myen gaw masu magaw chye ai, ga shatsawm chye ai... manang ni na pyaw na ra  na hku hkalem chye ai, ga sadi ndung ai myu re ngu hpe moi moi kawn an hkau ni chye chyalu re.... dai re majaw dai ni nang hkau mung myen  ni shaga jaw ai shat sha poi ... Bu gyi, Bu mu salang kaba  gyi nga nna hkalem sha ai kaw lau sha ai kaw jahkrit shama sha ai kaw nlawm u ga  ngu... sadi num htet mayu ai hkau e... Myen hpe mung kan ting kadai akam ma ai hkau e... ya yang shanhte hpe madi garum taw ai  Miwa (china) Russia  zawn re ni  shanhte hpe tsawra hku hkau nna garum taw ai hkum shadu... krau sha krawk  sha manu taw ai majaw sha re... mungkan ting hpe masu taw ai myen re... hkum kam dam... hkum kam dam... myen hpe... hkum kam dam hkau e...

Myen hte jing hku nhku tim anhkau ni nmatsan na re, njam jau na n re... hkau e..ngai nhkau shingan de du hkawm jang she anhte jing hpaw ni hpe mung hpawm myen mung dan kata nga laga myu sha hpu nau ni kade ram kam kaba nga ma ai ngu hpe mu chye lu ai... anhte  a KIO...KIA ngu hpe grai kam hpa kaba ma ai ..india mung na North East rawt malan ni hte shanhte  a myu sha ni kawn hkawt anhte hpe kam kaba ma ai re... anhte a shing du de mung shawa n gun gaw myen mung dan na population hta grau law ai hpe ngai mu lu ai shaloi... Dai ni anhte a ning baw ning la ni hpa majaw myen hpyen ni hte jing hku hten na hkrit tsang ma ai  kun ngu ga san san mayu wa nngai... myen gaw anhte jing hku nre, myen gaw anhte a hpyen she re... anhte ra sharawng ai lam nbyin ding sa gaw myen gaw anhte a jing hku galoi mung nmai byin ai... myen gaw dai ni du hkra anhte hpe akyu jaw  lai wa yu ai lam labau hta mung nmu yu shi ai... nga mung nnga ai... 1947 ning mung hpawm myen mung dan shang lawt lu ai ten kaw na 1987 du hkra mung kan  kaw nna mung hpawm myen mung dan hpe mung masa hku nna mung sut masa hku nna mung madi shadaw ai ten re... ndai ten ni hta anhte ni gaw myen hpyen hpe laja lana ning hkap gasat nga ai re...

Anhte ni gumlang gasat nga ai hpe mungkan kaw na masat masa galaw ai lam nnga ai..rawt malan hpung langai hku nna pyi nmu ai... kasu gabrawng hpung langai hku nna sha mu ai re. Dai hku mu hkra mung myen hpyen nig aw mung kan kaw ndau shabra ya ma ai... rai tim 1988 ning a hpang daw kaw nna mung hpawm myen mung dan a kata mang hkang hpe mung kan kaw nna mu chye wa sai hte an hte amyu baw sang ni hpa majaw myen hpyen hpe gasat gumlang rawt malan galaw ai ngu lam ni hpe mung mung kan gaw chyena  wa sai re myen mung dan a mang hkang gaw democracy mang sha nre, amyu baw sang mung daw mung dan rap ra lam nnga ai majaw mung hpawm mang hkang hte democracy mang hkang re ngu mu mada ai majaw mung hpawm myen mung dan a mang hkang hpe 1. amyu baw sang 2. democracy uphpung hte 3. myen hpyen dap ni brum masum  hkrum rai jahkrum bawng ban sa wa na lam hpe UN a daw dan minit  daw dan sai re... Dai ni myen wa gaw ndai lam byin na hpe hkrit tsang dik nga ai re...

Dai re majaw amyu baw sang rawt malan uphpung ni hte democracy hpung ni nhkrum hkra  mung shi galaw taw nga ai ..maga mi kaw makau grup yin asian mung dan ni hte mung kan kaw nna chyawm adawt ..sut masa lam pat shing dang shara shagu miman kaji mi man ka taw nga ai..mung kan de gaw  ya anhte  amyu baw sang rawt malan hpung 13 hte  simsa lam la nna democracy lam yan masa de hkawm wa nga ga ai nga  tsun .  aten galu garawt nna  rawt malan hpung ni  hpe shanhte a gaiwang kata de jashawn..maga mi de democracy shamu shamawt ai masha ni hpe rim sat nat htawng bang ..mung shawa hpe shagri brep numla dam na hku galaw dan..Rawt malan hpung shagu hpe gaw hpaga yum ga lam hte ntai nmai re ai ahkaw ahkang ni jaw shalan masu. nna masum brum nhkrum hkra ladat amyu myu shaw nna galaw nga ai..ngai mau ai gaw hkau e kaga nre…ya ten Miwa, Russia  hta lai kadai mung myen hpyen hpe nmadi shadaw ai ten re ..ndai zawn re ten hta anhte gaw myen hpyen hpe laja lana rai nna ninghkap na ten hta she myen hte jing hku kaba hku nna kanawn mazum let myen hpyen hpe ning hkap ai ni yawng gaw anhte a hpyen da..mau sa.. mau sa…kaning re lawng dat lu sha wa sha hkrup masai kun  myen e wu katut kau hkrum sam sai she shadu ai..hpa baw mung masa rawt malan masa rai kun?

Yu pyi nchye yu mat sai le hkau e..ngai hkau  rawt malan  salang lahkawng hte hkrum shaga yu ai..myen hpyen ni woi awn ai  mung bawng zuphpawng jahtum ngut kre du hkra lung na ..ra tim nra tim jaw tim njaw tim jahtum referendam du hkra hkan na da…bai langai mi tsun ai gaw anhte ndai zuphpawng lung ai lam gaw anhte ra ai nbyin na re mung chye ai  anhte hpyi ai nlu na re mung chye ai .akyu nlu nmai byin na rai yang hpa majaw sa lung ai?...yawng yawng ndai mung bawng zuphpawng hpe ning hkap taw nga ai ten re ... ndai mung bawng zuphpawng gaw tara  rap ra lam nnga ai majaw mung kan mung mung shawa  mung madi shadaw ai lam nnga  ai ..dai rai yang anhte ni hpa majaw myen hpyen a ra hkan taw nga ga ta?...nbawng yu yang hpa mung nchye ai da ..dai majaw bawng yu ra ai nga ..ndai ga Teng ai ..rai tim bawng yu ngut sai .tinang ra ai lam ni tang shawng ngut sai nmai byin lam mung mahtai chye sai dai rai yang hpa lam hpe naw myit mada shara   nga ai kun?..mung shawa yawng gaw mau mahka ma masai mung bawng zuphpawng  kaw mung K DA ..NDAK…hte KIO kaw na  K masumdat kasa ni hte myen nchyang mayam tai nga ai jing hpaw mying gun dat kasa ni ..ga hkaw mi pyi tinang ra ai ahkaw ahkang myit kraw kata  rawng ai lam ni hpe ading tawk tsun shaga nlu ai n,gwi ai ...

Mung masa lam hta mi man tau hkat ai baw nre..hkrit kaya ai baw mung nre..ntsun gwi nshaga gwi jang gaw dat kasa  hku nna mung nsa ga ,,nmai shaga rai yang nlu shaga nmai shaga na  rai yang mung nsa ga nlung ndung  ga ...majoi sa dung mau mahka nna bai nhtang wa ai lam gaw hpa akyu rawng a ta?.. njaw n, ang ai lam hpe gaw ja ja ning hkap ga ...anhte jing hpaw ni nlawm ai mung bawng rap daw zuhpung hpe shan hte hkrai mai galaw ai nga yang mung galaw mu ga le..anhte a akyu ara nlawm na hpawng hta hpa di shang lawm taw na…. hkau e…..ahte amyu baw sang nhkum ai rai yang dai myen hpyen ni galaw ai mung bawg ram daw ga ra hku nna mung nmai byin ai..sha n,ga mung shawa  nlawm ai shi hpyen dap mung gade laknak kaba  hte gaw gap da ai rai tim ..na na lu tsap na nre..mai tsap na  n re..ya ten hta ..myen hpyen dap kata shani shana byin taw nga ai mang hkang kaba gaw hpyen hprawng mang hkang kaba re..myen dap kaw kadai nkam rawng ai nkam galaw ai..majoi shat jahkut sha na matu shang  lawm taw masu ai hkrai rai ma sai. hpyen gasat na gaw hkum tsun ..majoi pa shalaw sum la sha re..shani shana  hpyen la nau hprawng nna myen dap up ni ntsa de tang madun na pyi hkrit taw nga ma ai. ya ten shing gan de hprawng du ai myen hpyen la jahpan Mun lam she rai sai...

Ndai gaw anhkau ni a matu ahkaw ahkang kaba nan rai taw sai .myen hpyen dap a kata lam masa hpe aten lu yang lu ai hku ngai nhkau  bai shana wa wa rai na ….bai ngai .. mu chye na ga ai mung bawng rap daw kaw gaw wang lu wang lang tsun shaga lu ma  ai tang madun lu ai..tang madun wa ai sumtang yawng hpe du sa ai...

Next>>