Time: 9:51

Publication

UK Mungdan Rapdaw hta Hkang hte Jinghpaw Wunpawng Amyu sha dat kasa ni tinang mungdan,amyu sha ni a hkrat sum nga ai ahkaw ahkang lam ni sanglang tang madun

Lai wa sai January 22 kaw nna 25 ya shani du hkra Jan N'shang Mungdan (England) a mungdan rapdaw hta UK mungdan hkring mang ni hte hkrumzup nna anhte Jinghpaw Wunpawng Mungdan hta byin nga ai mabyin, mung masha ni a yakhkak jam jau nga ai lam, roi rip hkrum sha nga ai lam ni hpe tang madun, sang lang dat mat wa sai lam chye lu ai.

Ndai lamang hta anhte mungdan kata na dat kasa ni sa du shang lawm na lam hpe lajang da ai raitim, nlu du mat ai majaw anhte amyu sha ni a matu, tsun shaga sakse hkam ai hta grai ningra mat wa ai hpe chye lu ai. Raitim, dang di lu ai made, London kaw du nga ai, amyu sha lam hta tsap nga ai ni myutsaw magam gun ni kaw nna UK mungdan rapdaw hta shang shaga sai rai nga ai. Jinghpaw Wunpawng amyu sha ni kaw nna, tinang amyu sha ni roi rip hkrum sha ai lam tsun dan na ahkaw ahkang lu ai, shawng nnan lang rai nga mali ai. Matut nna mung anhte amyu sha ni hte Munghpawm Myen mung hta mung masa lam ngwi pyaw simsa wa lu hkra UK asuya kaw nna, madi shadaw, garum mat wa na lam hpe chye lu ai.

Mali ya galaw lai mat wa ai lamang hta lawu na hte maren Jinghpaw dat kasa ni shang lawm mat wa sai lam chye lu ai.
 January 22 ya shani hta UK Hkring Mang dat kasa (Member of Parliaments, MPs) ni hpe mung masa lam, mung masha mayak manghkang rawt jat galu kaba lam hpe ja gumhpraw hte madi shadaw nga ai UK asuya a (Department for International Development, DFID) lithkam ni hpe mung jarit mayan (cross border) hku nna garum ning tum jaw na lam hpe dat kasa ni yawng tang madun lai wa sai lam chye lu ai. Matut nna WOMANKIND, Stop Trafficking ngu ai uhpung na masha kaba ni hpe anhte Jinghpaw Wunpawng buga na num kasha ma ni hpe dut sha hkrum ai lam ni, num ma ni hpe Myen hpyen ni roi rip ai lam (Sexual violence) hte anhte buga na num ni a hkrat sum ai ahkaw ahkang hte seng nna tsun sanglang, tang madun lai wa sai lam chye lu ai.

January 23 ya shani hte Mungdan Hkring Mang (MPs) nkau mi hte (the house of Lord) kaw na Lord nkau mi hpe mung matut nna Jinghpaw Wunpawng Amyu Sha ni a jam jau, roi rip hkrum sha nga ai masa lam ni hpe tang madun, sanglang dan lai wa sai. Shana maga gaw Christian Solidarity Worldwide kaw nna Ben Roger sawk sagawn ka lajang da ai, "Carrying the Cross: the military regime's campaign of restriction, discrimination and persecution against Christians in Burma" ngu ai laika hpe tara shang ndau shapraw ai lam galaw lai wa sai. Shi ai laika hta Munghpawm Myen Mungdan hta amyu sha ni gaw makam masham lam ahkaw ahkang grai hkrat sum taw nga ai lam ni ka shaleng bang da nga ai. Grau nna Christian ni hpe Munghpawm Myen Mungdan na atsai awoi shamyit kau na ngu ai masing ni SPDC hta nga ai lam hpe sakse hte hpawn mu sawk shagawn ka da ai hpe mu lu nga ai.

Ndai laika shabra ai lamang hpe Mungdan Rapdaw htingnu (UK Parliament) kata kaw galaw ai rai nna, Jinghpaw Wunpawng amyu sha dat kasa ni kaw nna presentation hte hkrat sum nga ai makam masham ahkawy ahkang lam sha n ga, Jinghpaw Wunpawng amyu sha ni gaphkat jahkring da ai aten, ya yang na mung masa lam, Jinghpaw num ni dut sha hkrum ai lam/roi rip dip sha hkrum ai lam (sexual violence), Jinghpaw mung hpun kawa, lamu ga hte makau grup yin hten za nga (Environmental issues) lam ni hpe du sa ai MPs, House of Parliament hte shiga dap ni hpe sanglang dan lu sai.

Matut nna January 24 ya shani hta Jinghpaw Wunpawng Amyu Sha dat kasa ni gaw, Hkang dat kasa ni hte arau, Ian McCartney, Minister of Trade, Investment and Foreign Affairs of UK wa hte hkrum shaga lai wa sai. Ian McCartney kaw nna chye mayu ai lam ni hpe san la ai lam galaw lai wa sai hta, anhte Jinghpaw dat kasa wa hpe gaw Miwa ga jarit na masa lam ni san lai wa sai. Jinghpaw Amyu Sha dat kasa wa kaw nna mung anhte amyu sha ni gaw Thai, India jarit zawn maigan shiga dap na shiga sara ni aloi ali sha du lu na yak ai majaw anhte mungdan kata hta byin nga ai SPDC a roi rip sha ai lam ni gaw kaga amyu sha ni a lam ram ndan dawng nga ai lam tsun dan sai lam chye lu ai. Matut nna, anhte amyu sha ni gaphkat jahkring da ai raitim, grai pyaw mat sai nre sha, mung masa ahkaw ahkang, galaw lu galaw sha lam ni lani hte lani, shawng na hta mung masha ni hkam sha nga ai lam tsun sang lang dan sai lam chye lu ai.

 January 25 ya shani hta Oxford dakkasu na Myen mung a lam myit lawm ai jawngma ni (Oxford University Burma Society) kaw mung Jinghpaw dat kasa ni kaw nna Jinghpaw Wunpawng Mung Masha ni a hkam sha nga ai mayak lam ni hpe tsun dan lai wa lu sai rai nga ai.

Ya na zawng amyu sha ni a lam, Munghpawm Myen Mungdan a mayak lam ni hpe sakse hkam ai lam ni hpe London, Brussel, Germany hte Washington DC ni hta matut galaw sa mat wa na re lam chye lu ai.

Shang lawm wa ai dat kasa ni gaw Kachin Women Association, Thailand kaw na Shayi Nang Seng hte Kachin National Organization kaw na Slg. Gun Tawng ni rai nga ma ai.

News also in:
http://www.csw.org.uk/latestnews/article.php?id=591
http://mizzima.com/MizzimaNews/News/2007/Jan/63-01-2007.html
http://mizzima.com/MizzimaBurmese/News/Home/2007/Jan/29-Jan-2007-47.htm

Urgent Press Release

Who's Online

We have 45 guests and no members online

Like Us on Facebook

Welcome to KNO information website!

The Kachin National Organization is a political organization founded on the 9th of January 1999. This formation was the result of extensive discussion between the overseas Kachins and the elders from the Kachin homeland.
Since the cease-fire agreement on the 24th of February 1994, the Burmese military dictatorship has steadily built up more garrisons in...