Home

NLUNG NNAN SHA SUT MANAU POI PROGRAM

Sat, 31 Oct 2009 11:20:01 +0000

Jinghpaw Wunpawng Laili Laika hte Htunghking Hpung
NLUNG NNAN SHA SUT MANAU POI PROGRAM
Deng (2) Aungta, Manau Wang, Manmaw

26.11.2009 (Bat 4 ya)

Shani tup

       - Hkai nmai shingjawng poi hte Ta Hpaji (Htunghking lang arung arai)
          shingjawng poi nga na.

- Manau Wang hta manam hkap tau hkalum shara jahkrat lamang nga na.

Shana de daw 4:00 Pm

- Manau Htingnu Dingshawn shang hte Nlung Nnan, Manau Poi mung shawa kyu hpyi hpawng nga na.

Shana de 6:00 Pm

   - Yungwi Pinra hpaw ai kyu hpyi hpawng nga na.

   (1) Amyu shayi ni woi awn ai atsam madun shingjawng lamang nga na.

   (2) Nlung Nnan Sha Sut Manau Tsawm Shayi Shingjawng lamang nga na.

   (3) Yungwi Shingni shanyi shadang sha ni shangwi shapyaw shang lawm na.

27.11.2009 (Bat 5 ya)

Jahpawt daw 8:00 Am

   - Manau Wang Hkapang lai sumpan rep hpaw poi nga na.

   - Ningbaw ningla ni Nlung Nnan sha Manau Mungga tsun shana ya ai mung
      shawa hpawng nga na.

   - Manau Pa Hkapang hpaw poi nga na, Seng ang ai ni woi awn sa wa na.

Jahpawt daw 10:00 Am

   - Nlung Nnan sha Sut mnau, Naw baw lamang nga na.

Shani 12:00 - 2:30 Pm

   - Ninghtawn (4), Gaiwang (12) na Htawngka, Lisu Dagaw, Lachik ka hkrang marai 12 hta n jan ai, ka lawm nna aten minute 15 n jan na hte tinang ra ai lam langai ngai ka manawt lamang nga na. Lahta na lamang hta shang lawm na ni 10.11.2009 hpang n hkrat ai sha jahpan sa ya marit.

   Ka manawt hpung ni hpe malu masha hte nga shara hpe Poi shanyin shatai momiti kaw nna lit la ya na ga ai. Kaga ra ai lam ni hpe madu buga kaw nna lit la jahkrum shatup sa wa ga.

   - Hpunau Myen, Sam, Gawrahka, Kayin, Hkang htunghking ka manawt shang lawm na.

Shana de daw 3:00 Pm

   - Nlung Nnan sha Sut Manau, Mung shawa yawng hte san da ai ni Manau lamang nga na.

Shana 6:00 Pm

   - Yungwi shingni Lamang nga na. (Yungwi Shingni Komiti kaw nna woi awn sa wa na)

28.11.2009 (Bat 6 ya)

Shani tup

   - Nlung Nnan sha Sut Manau Poi "Golf" ginsup lamang nga na.

   - Htunghking Htingnu rapdaw kaw shakram hkri awn magun lit htang ai lamang nga na.

Jahpawt daw 9:00 Am

   - Nlung Nnan Sha Sut Manau, Mung Shawa yawng hte san da ai ni Manau nau ai lamang nga na.



Shani 11:00 Am - 2:00 Pm

   - Ninghtawn (4), Gaiwang (12) na Htawng ka, Lisu Dagaw, Lachik ka hkrang hte tinang ra ai lamang langai shang lawm ka manawt lamang nga na.

   Ka manawt hpung ni hpe malau masha hte nga shara hpe Poi shabyin shatai komiti kaw nna lit la ya na ga ai. Kaga lam ni hpe madu buga kaw nna lit la jahkum shatsup ga.

   - Hpunau Myen, Sam, Gawrahka, Kayin, Hkang Htunghking ka manawt shang lawm na.

Shana de daw 2:30 Pm

   - Nlung Nnan Sha sut Manau Poi hpe, Mung shawa yawng hte san da ai ni Manau Poi shangut ai Nau gup lamang nga na.

   - Htunghking Htingnu rap daw kaw shakram hkri awn magun lit htang ai hte alu jaw ya ai ni hpe shagrau chyeju dum ai lam shagrau htang mat wa na.

Shana 5:00 Pm

   - Nlung Nnan sha Sut Manau Poi, Mung shawa man hkrum lu sha ai hpawng lamang nga na.

Shang lawm na lamang ni

   - Nlung Nnan sha Sut Manau Poi, man hkrum lusha hpawng Mungga tsun shana
      ai lamang nga na. (Poi shabyin shatai momiti ni woi awn sa wa na)

   - Shagrau sha-a lamang nga na

   - Yungwi Shingni Shayi shadang sha ni shangwi shapyaw ya na.

Shana 6:00 Pm

   - Yungwi Pinra (Stage Show) lamang nga na. ( Yungwi Shingni komiti ni woi awn sa wa na)

   - WNJ hte Sinpraw Majoi hpung ni shang lawm na.

   - Yungwi Pinra lamang ngut sai lam kyu hpyi hpungdim na.

   Nlung Nnan sha Sut Manau Poi hpe Karai Kasang a shaman chyeju hte awng dang ngut kre sai lam masat da na.

Nlung Nnan sha Sut Manau Poi Komiti
Deng (2) Aungta, Manau Wang, Manmaw

UK Mungdan Rapdaw Tsun Shaga ahkang aya matsun ya ai wa (Mr Speaker), John Bercow kaw nna Myen mung masa lam the seng nna hkaptau lamang galaw.

Fri, 23 Oct 2009 21:40:32 +0100

London, 21^st October 2009: UK mungdan na KNO malawm Jan Nang Seng kaw nna mung dai na maga de Myenmung dan hte seng nhtawm galaw ai UK parliament na Speaker, John Bercow a hkaptau lamang (reception) kaw sa shang lawm lu sai. Dai hkaptau lamang hta British Foreign Secretary David Miliband, Prime Minister Gordon Brown a madu jan Sara Brown, Foreign Minister Ivan Lewis, British Ambassador Andrew Heyn, All Party Parliamentary for democracy in Burma kaw na amu madu Alistair Carmichael hte laga MP ni hte Myen mungdan democracy lu na matu galaw nga ai, saw shaga hkrum ai Myen mung masha n kau myi mung sa du ai.

hkaptau lamang hpe Mr. Speaker rai nga ai John Bercow kaw nna hpaw hpang ya n htawm, David Miliband hte Burma Campaign UK kaw na Zoya Phan ni myen mung a lam hte seng na tsun shaga lai wa ai. Mr. Speaker gaw myen mung democracy lu na lam hpe laiwa sai aten hta grai galaw lai wa sai raitim, ya Speaker magam hpe gumhpai nga ai kaw na dai ram n lu shang lawm mat ai majaw myit n pyaw ai lam, raitim, shi a myen mung masha ni tengman ai ahkaw ahkang lu na hte seng nna tawn da ai dawdan da ai (commitment) gaw galoi mung n mat mat na hte ahkaw ahkang lu shagu galaw sa mat na re lam, n dai zawn re hkaptau lamang hpe shi galaw ai gaw human rights hte democracy hpe hkap la ai ni yawng a hero rai nga ai Aung San Suu Kyi hpe shagrau ai hta sha n ga, shi dangdi ai daram shi tsap nga ai shara kaw na Myen mungdan masha ni a matu galaw ai re lam, myen mungdan mung masha ni democracy lu hkra galaw shakut nga ai activists ni yawng hpe mung shagrau mayu ai hku na n dai lamang hpe galaw ai re lam tsun shana ai.

Matut nna, David Miliband tsun shaga wa ai lam hta UK Asuya hku na dangdi ai ram Myen mung a lam hta galaw shaja nga ai lam, international community hpe mung galoi mung matut mahkai let tsun shaga nga ai lam, myen hpyen Asuya kaw na galaw da ai Constitution gaw myen mung masha ni a matu rapra ai ahkaw ahkang hte shinggyim ahkaw ahkang n lawm ai hpe shan hte chye na ai lam, myen mung democracy lu na matu galaw shakut nga ai ni hte myen mung mung chying sha ni hte myit masin langai sha (solidarity) galoi mung nga nga ai lam, UK asuya kaw nna, myen mungdan galai shai na matu galaw sa wa ai lam gaw aten kadun hta kalang ta mahtai n lu mu tim, aten galu ningdaw langai mi hta gaw mu lu wa na re lam ni hpe tsun shaga lai wa ai.

Dai ngut ai hpang Zoya Phan gaw 2010 election gaw myen asuya u hkang ladat asak galu na matu galaw ai sha rai ai lam, shan hte a constitution gaw anhte myu kaji (ethnic groups) ni a matu amyu mat, mungdan mat (death sentence jahkrat) ai the bung ai zawn, ethnic ni a matu hpa ahkaw ahkang n lawm ai constitution sha rai ai lam, matut na UK asuya kaw nna myen mung a lam hte seng n htawm grau galaw sa wa na hpe mung grai myit mada ai lam tsun shaga ai.

Dai ngut ai hpang gaw lajang da ai malu masha hpe yawng jawm sha let du sa ai shawa masha ni tsun jahta-kanawn mazum hku hkau ai hku na myen mung a lam hpe jawm jahta let ai shana na hkaptau (reception) lamang hpe shangut ai hku re.

Dai ni 21^st October 2009 gaw myen mung a lam hte seng n htawm significant byin ai n htoi re. Mungkan hpe woi awn nga ai mungdan kaba ni rai nga ai US hte UK a government shara hta myen mung a lam hpe ahkyak la let tsun shaga ya ai shani mung rai nga ai. US Congress kaw gaw Foreign Affair Committee ni Myen mung hte seng na hearing galaw ai, discussion galaw ai zawn, n dai UK parliament kaw gaw Speaker a myen mung hte seng ai hkaptau lamang hpe galaw ai hku re.

Note: Mr. Speaker re ai John Bercow MP [www.johnbercow.co.uk ]gaw lai wa sai June 2009 du hkra UK House of Common a All Party Parliament Group for Democracy in Burma a Co-chairman hpe shaning law law magam gun wa n htawm myen mung a lam hpe grai myit shang sha let, commitment hte dang di lu ai ram shi a marai mahkra hte Myen mung dan democracy lu na matu shakut shaja lai wa sai re.[ http://en.wikipedia.org/wiki/Speaker_of_the_British_House_of_Commons]

{linkr:bookmarks;size:small;text:nn;separator:+;badges:*}

Hka La Yang Mare Bum Kaw Hkam Da Ai Bawm A Majaw Masha (2) Bawm Kabe Hkrum NNa Tsirung Du

Wed, 30 Sep 2009 11:02:30 +0100

Hka La Yang mare makau na bum hta hkam tawn da ai ga bawm hpe kabe la ai majaw mare masha (2) hkala hkrum sha wa ai lam buga masha langai tsun ai.

Bawm kabe hkrum ai mare masha lahkawng yen gaw Hka La Yang bum de sa ai majaw ndai zawn hkrum sha wa ai hte shan lahkawng hpe ya yang e Laiza tsi rung hta tsi lajang nga ai lam chye lu ga ai.

Bawm hpe Wunpawng Mungdan Shang Lawt Hpyen Dap ni hku nna Hka La Yang bum hta hkam tawn da ai rai nna, mare masha ni hpe mung bum de n lung na matu sadi jaw da chyalu re hpe mung mare masha wa tsun dan wa ai.

Shanglawt hpyen dap hte myen ni gaw Jarit Sin Dap de hkrang galai shai na hte seng nna lang hte lang bawngban jahkrup ai raitim, ya du hkra myit hkrum lam n lu la shi ai majaw hpyen masa lam hpe shada da sadi maja let nga nga ai lam buga masha ni tsun gajai ma ai lam chye lu ai re.

Hpyen masa hpe tau hkrau hkyen lajang da ai hku nna Hka La Yang bum kaw shanglawt ni hku nna bawm hkam ai lam mai byin ai nga nna mare masha wa tsun dan ai.

Shanglawt hpyen hpung nkau mi gaw ya yang e nam shang shang ma sai lam hpyen hte ni nawn ai masha langai tsun dan wa ai.

Dai hte maren Myen hpyen ni mung majan byin wa na hpe tau hkyen lajang ai hku nna shana ning sin hta e hpyen dap nkau mi hkan hpyen la jat bang ai lam hpe galaw nga ma ai nga nna Myitkyina buga masha tsun dan wa ai re.

Bawm kabe hkrum ai mabyin gaw laiwa sai bat mi ram hta byin ai rai nna, hka la hkrum ai Hka La Yang mare masha lahkawng yen gaw grai sawng ai raitim, Laiza tsi rung hta asak hkrung let nga nga ai lam chye lu ai.

Hka La Yang mare gaw Nmawk ginwang daw n-pu hta e nga ai mare kahtawng langai rai nna, Daw Hpum Yang mare hte deng (3) ram tsan gang ai mare kahtawng langai rai nga ai.

{linkr:bookmarks;size:small;text:nn;separator:+;badges:*}

KNO/KNC ningbaw wa a mungchying masha ni hpang de n'dau shabra laika

Fri, 25 Sep 2009 12:14:25 +0100

Email:info@kachinland.org, Website: http://www.kachinland.org/

N’Htoi, 15/09/2009

Tsawra ai jinghpaw wunpawng mungchying mungshawa yawng hpang de ya yang hkyak hkyak byin pru nga sai mung masa hte amyu masa sat lawat hte seng n’na tang sha na dat ai.

Mung masa labau kadun.

1.Anhte Jinghpaw Wunpawng amyu sha ni-gaw lai mat wa sai shaning law law kaw nna anhte amyu ni anhte a lamu ga kaw ngwipyaw ai hku asak hkrung nna nga lai wa sai.1926 ning a hpang daw de English mung maden ni up hkang ai n-pu kaw bai nga ra sai.1942 ning kaw nna mungkan majan 2 bai byin wa nna Japan mung maden a n’ pu kata kaw anhte a lamu ga n kau mi hkrat sum nga sai. Raitim kade n-na yang mungkan myit hkrum hpyen hpung hte anhte a kaji kawa kanu kana jinghpaw myutsaw share shagan ni law law gaw japan mung maden hpyen hpe gasat manga kau nna tinang lamu ga hpe bai lu la sai.1945 ning hta mungkan majan (japan majan) ngut sai.Jinghpaw ni tinang amyu hpe tinang bai uphkang lu na matu lajang nga sai. Duwa council hpaw nna jinghpaw Shanglawt mungdan lu na matu lajang wa nga sai.Dai zawn jinghpaw ningbaw ni tinang mung hpe tinang bai lu la na matu lajang nga ai ten hta myen ningbaw Awngsan wa lung wa nna shanhte myen mung hte Shanglawt rau la nna rau jawm nga na matu bawngban wa sai.Jinghpaw ningbaw ni gaw myen, kaya, sam, hkang hte kaga amyu baw sang ni hte rapra ai mung masa ahkaw ahkang tara kata kaw rau jawm nga na matu myit hkrum sai. Dai majaw, 1947 ning hta Sam mung , pang lung mare kaw e Sam,Kaya, Hkang Myen ni hte rau jawm nna munghkawm mungdan langai de la nna rau jawm nga na matu Jinghpaw ni gaw, myit hkrum ga sadi laika galaw sai. Dai myit hkrum ga sadi hte maren munghkawm mungdan langai de nna ahkaw ahkang rapra ai kata kaw rau jawm nga na matu mungdan tara kanu galaw nna myen ni hte rau Shanglawt la nna rau jawm nga hpang wa sai.Myen hte rau jawm nga ai kaw nna Jinghpaw ni gaw matut manoi jam jau n ni nkri hkrum sha hpang wa sai.Myen amyu shada da nram ai kata kaw myen amyu ni gaw kaga amyu bawsang rai nga ai Kayin, Paoo, Sam ni hte majan byin sai. Myen shada da mung laja lana majan bai byin nna myen mung ting gaw n ngwi npyaw jam jau kaba hkrum sha nga sai. Dai zawn mungdan ting majan byin nga ninglen myen amyu ni gaw kaga amyu baw sang ni hpe hpyen gumshem ladat lang nna shani shana dip rip sha wa sai. Rapra ai ahkaw ahkang hpe nlang ai.Myen shada da mung hpyen masa lang n’na diprip sha wa nga sai.

2.Dai zawn re ai myenmung a mung masa lam hta jinghpaw ni mung, rau jawm nna matut nga na matu yak hkak wa sai hpe chye ai jinghpaw ningbaw ni gaw myen asuya hpe bai gasat wa sai. Jinghpaw ningbaw Lahpai naw seng woi awn nna 1949 ning kaw nna jinghpaw ni rawt malan ai lam hpe galaw wa sai. Myenmung a mungdan tara kanu hpe Federal lai masa hkrak re ai mung masa tara kanu hpe bai sharai galaw la na matu lajang ai. Raitim myen ningbaw ni myit magaw nna mungdan tara kanu hpe myen ni chyu sha ahkaw ahkang ka-up nna uphkang sha mai ai lai ladat hpe sha matut galaw da ai.

3.Myen ningbaw ni gaw, mungdan ting hpe hpyen ladat hku nna,prat dingsa uphkang sha mayu ai majaw, NEWIN woi awn ai hpyen gumshem hpung ni mungdan a daru magam ahkaw ahkang hpe zing la sai. Dai hpang grau nna shanhte ra ai ladat hte myen mung hpe up sha na matu MSL hpung hpaw nna tara ningnan hte mungdan ting hpe ka-up uphkang sha wa sai. Jinghpaw,Kaya,Sam ni hte Hkang ni rau jawm galaw da ai mungdan tara kanu hpe jahten kau sai.

4.Dai hpang 1961 ning hta gaw,Jinghpaw ni mung,KIO ngu ai Shanglawt mung masa hpung hpaw wa sai. KIA ngu ai Shanglawt rawt malan hpyen dap hpaw la nna myen hpyen asuya hpe gasat hpang wa sai.KIO wu hpung gaw maga mi de sinat wamyam hte gasat nna maga mi de n gup aga hte saboi n-tsa kaw bawngban ai ladat hpe mung lang nna,tinang amyu sha ni a lu ang ai ahkaw ahkang bai lu la na matu shakut wa sai.

5.1988ning shata man 8 hta gaw,myen mungdan masha ni kaw nna, MSL myenhpyen asuya hpe n-gup hte marawn nna,mungshawa n-gun hte gawt kau sai. Raitim myen hpyen dap ni gaw grau nn,nhkru n kaja ai hpyen jaubu ni woi awn nna gumshem hpyen ladat hte myen mung hpe bai diprip up hkang sha wa sai.

6.Dai zawn rai nna KIO ,KIA ni- gaw tinang amyusha ni lawt lu hkra nga nna shakut nga ding yang kaw e Ningbaw kaba Maran Brang Seng hte Dukaba Mali Zup Zau Mai woi awn ai KIO ningbaw ni gaw,myen hpyen dap asuya hte gap hkat ai lam hpe jahkring na masing hpe jahkrat dat sai.Dai masing hte maren 24/2/1994 ya shani e myen hpyendap asuya hte gap hkat ai lam jahkring nna,mung masa hpe n-gup aga hte jawm jahta na matu lajang wa sai. Shada da sinat wanyam hte gasat gala ai lam hpe jahkring da nna n-gup aga` hte jahta na matu lajang sa wa ai raitim, tatut hta` myen hpyen dap asuya gaw mung masa bawngban woi ai lam n- nga ai. Dai zawn mung masa lam hpe mung shawa hte hkrak rai bawngban ai lam n nga ai sha,myen hpyen dap ni-gaw, NC woi galaw nna myen mung a mungmasa tara kanu hpe SPDC ni-gaw shanhte ra ai hku ka lajang wa sai. KIO ni mung ndai myen ni woi galaw ai NC kaw shanglawm nna,tinang ra sharawng ai lam yan ni hpe tang madun bawngban ai Tang madun ai lam ni hpe n-hkap la ai Jinghpaw ni hte kaga amyu baw sang ni ra sharawng ai lam ni hpe sepkawp n-hkap la ai .Shanhte Myen amyu mungshawa law malawng ra sharawng ai mung masa lam ni hpe mung, myen hpyen asuya gaw ,kachyi mi mung myit yu hkan sa ai lam n- nga ai sha shanhte byin mayu ai hpyen masa hpe sha atik anang galaw da sai. Ndai zawn n-jaw ai masa hpe SPDC myen hpyen dap asuya woi galaw ai lam yan hta n-jaw nga sai hpe chye nga ninglen KIO ni gaw myen hpyen asuya hpe myit galu kaba ai lam madun nna shanglawm shakut lai wa sai.KIO ni kaw nna kade ram myit galu kaba ai lam hpe madun ai raitim,SPDC myen hpyendap asuya ni gaw,Jinghpaw amyu bawsang ni ra sharawng ai lam ni hpe kachyi mi mung myit yu ya ai lam n nga mat sai. Ndai zawn rai nga mat sai majaw, Jinghpaw Wunpawng amyu sha ni hte Jinghpaw mung kata kaw shanu nga ai mung chying mung shawa yawng hte myen hpyen dap asuya gaw rau jawm nna mung dan langai kaw nga na matu yak mat sai. Dai hte maren kaga amyu bawsang ni rai nga ai Kayin,Kyinni(Kaya),Mun,Rahkai,Sam hte Hkang amyu baw sang ni mung, munghkawm mungdan langai kaw rau jawm nga na matu gaw yak dik mat sai aten kaw dai ni du nga sai.

7.Ndai zawn rai nga ai mungmasa lam a majaw, Jinghpaw ningbaw n kau mi gaw,tinang Jinghpaw amyu ni a mungmasa hpe ading rai nga lu na matu,hte tinang Jinghpaw amyusha ni lawt lu na matu KNO ngu ai Mung Masa hpung hpe hpaw la n htawm,tai hpyen rai nga ai myen hpyen dap asuya hpe ninghkap gasat ai lam hpe matut manoi galaw nga sai. KNO nig aw,Tinang amyu Shanglawt lu na matu shani shana matut galaw ding yang rai nga ai.Myen mung ting hpyen asuya a nhkru ai masa lam kaw nna lawt lu na matu hpe mung,kahpu kanau rai ngaai,Kayin,Kayinni(Kaya),Mun,Rahkai,Sam,Hkang hte myen ni yawng rau bawng nna,myen hpyen dap asuya hpe ninghkap gasat nga ding yang rai nga ai.

Ya hkyak hkyak anhte Jinghpaw Wunpawng amyu sha ni kaw byin nga ai mungmasa, hpyen masa lam ni.

1.Myen hpyen asuya ni kaw nna jinghpaw mung kaw nga ai gaphkat jahkring sinat lang rawt malan nga ai mung masa hpung ni yawng hpe jarit sin pyada tai ra ai ngu sai. Ndai zawn jarit sin pyada shatai na lam hpe KIO,KIA ni kaw nna nlu hkap la ai majaw, Jinghpaw mung makawp maga hpyen dap,shing n-rai jinghpaw mungdaw makawp maga hpyen dap ngu mying hpe bai sharai ya na matu tang shawn ai lam hpe SPDC myen hpyen dap ni kaw nna sepkawp nhkap la ya ai.

2. KIO ,KIA hpung ni-gaw tinang myen mung kata kaw shada da sinat wanyam hte bai gasat ai lam hpe n-kam galaw ai majaw, Jinghpaw kasa salang ni hpe dat nna,SPDC myenhpyen dap asuya ningbaw ningla ni hpe PINMANA ( Ne Pyi Daw )de sa nna,jahkrup bawngban ai lam hpe kahtap galaw dat ai. SPDC ni kaw nna jinghpaw ni tang madun ai lam ni hpe kachyi mi mung hkap la ya ai lam n -nga ai. Shanhte SPDC ni tsun da ai hte maren sha KIO, KIA ni, hkan sa ra ai lam, kaga laksan ahkaw ahkang galai ya na lam nnga sai lam tsun sai. Shan hte galaw da ai Mung masa tara hpe galai na lam nnga sai lam hpe dan dan tsun dat sai. Jarit sin pyada galaw shangun ai pyi gaw, sha da da matsan dum ai hku nna lam tam ya ai lam sha re ai ngu tsun jaw sai.

3.Ndai zawn byin nga ai ten hta`Myen hpyendap asuya hte shawng ningnan Gaphkat jahkring ai lam hpe la nna nga sai KOKANG hpyen hpung ni hpe ( )aten hta` myen hpyen dap asuya ni-gaw, hpyen n-gun hte htim gasat nna KOKANG ginra hpe zing la sai.Myen hpyen dap asuya ni-sadi run mat sai. Shanhte a`hpyen n-gun lang nna mungdan ting hpe kasat na matu lajang wa sai.KoKang sha n-rai kaga gaphkat jahkring hpung ni yawng hpe mung, gasat shamyit kau na matu lajang nga sai.

4. Ndai zawn kokang ginra hpe myen hpyen dap ni zing la ai ten hta`,Wa mung hpe mung myen hpyen dap ni –gaw,hpyen n-gun law law hte singda nga sai.Jinghpaw KIA dapba mali hpe mung hpyen n gun hte kahtep matep da nga sai. Tinang KIO, KIA ginra ni hta` mung, myen hpyendap ni-gaw hpyen n-gun law law hpe sa da nna, sinat wanyam hte gasat na jin jin rai nga sai. Myen hpyen dap ni-gaw, Jinghpaw ni hte wa ni hpe gasat na matu masing hpe hkrak sha jahkrat da sai. Ndai zawn byin nga ai aten kata kaw e Jinghpaw ningbaw ni-gaw gasat gala ai lam hpe koi yen nna shada da ngwipyaw ai hku jawm nga lu na lamang hpe tam lu na matu, Jinghpaw mung kata kaw nga ai Mung Du Salang law law hpe Laiza mare kaw shaga nna 5/9/2009 ya shani mungshawa zuphpawng hpe galaw sai. Dai zuphpawng kaw n’na, SPDC hpyen asuya hpe lahkawng maga ra ai lam ni hpe bawngban na matu jinghpaw ningbaw ni hte KIO ningbaw ni akroi anoi jahkrup wa sai. Raitim SPDC myen hpyen dap ni gaw KIO ni hte Jinghpaw Wunpawng Mung Shawa a ra sharawng ai lam hpe kachyi mi mung myit yu ya ai lam nnga mat sai. Shanhte (SPDC) ni ra ai hku sha hkan sa ra ai ngu bai nhtang tsun ai. Ngu mayu ai gaw, KIO, KIA ni hku nna jarit sin pyada hku nga na hpe tsepkawp hkap la ra ai lam sha rai nga sai. Myen hpyen asuya hte KIO ni shada da mung masa hpe bawngban jahkrup la na matu lam htum mat sai.

5. Ya yang ten hta Jinghpaw mung kaw nga ai myen hpyen dap ni gaw, KIO, KIA ni hpe gasat na matu jin jin rai nga sai. Myen hpyen dap law law hpe tinang KIA ni nga ai shara shagu makau grup grup kaw shadu da sai. Gasat na amying hpe sha la nga sai.Tinang KIA hpyen dap ni mung, tinang lu ai sinat wanyam hpe lang nna, tinang amyu hte tinang mungdan lamu ga hpe makawp maga na matu jin jin rai nga ai ten kaw du nga sai. KIA hpyen dap kaw nna, tinang mundan hpe makawp maga lu na matu, myutsaw hpyen la ni shani shana shajin nga sai.

6. N dai zawn tinang mungdan lamu ga hpe tai hpyen myen wa gasat sa wa na hpe chye nga sai tinang myutsaw UKA (jinghpaw wunpawng mungdan hpyen dap) ni mung, tinang amyu tinang mungdan hpe makawp maga na matu,jin jin rai nga sai.UKA hpyen dap kaw magam gun nga ai myutsaw share shagan ni yawng gaw,KIA hte rau rai nna,tinang amyu hte tinang mungdan hpe tinang a asak hte galai nna makawp maga na matu hpe mung jin jin rai nga sai.Mungdan hte amyu hpe n’shut nshai makawp maga ra sai. Ndai majan gaw anhte amyu ni dang nan dang ra ai.Dang hkra gasat ra ai.

Jinghpaw wunpawng mungdan hte Jinghpaw Wunpawng mungchying mungshawa yawng hpe makawp maga ai lamang hta amyusha ni yawng shanglawm na lam.

1.Jinghpaw wunpawng mungdan kata kaw nga ai mungchying mungshawa yawng ,tinang lamu ga hpe makawp maga na matu jin jin rai nga ga.( jinghpaw,myen,sam,kala,miwa,)

2. Jinghpaw wunpawng mungdan mungchying mung shawa yawng gaw,tinang lu ai ja gumhpraw,tinang chyechyoi ai nyan hpaji,tinang lu ai n-gun atsam yawng hpe lang nna,tinang mungdan hpe makawp maga na matu ap nawng ga.

3. Maigan shara shagu kaw chyam bra nga sai tinang jinghpaw Wunpawng mungchying masha ni yawng mung, dai ni gaw tinang mungdan hpe makawp maga ra sai majaw, lawan bai n htang wa nna mungdan makawp maga ai lam hta` yawng shang lawm ga.

4. Jinghpaw wunpawng mungdan kata kaw shanu nga ai ramma kaji kaba, num, la yawng gaw, tinang a asak hpe ap nawng nna tinang a` mungdan hpe makawp maga ga.

5. Jinghpaw wunpawng mungdan hpe makawp maga na matu Tinang UKA hpyen dap hte KIA hpyen dap de lawan ladan sa-wa marit.

6.Jinghpaw wunpawng mungdan kata kaw shanu nga ai mungchying mungshawa yawng hte gaw tinang lu ai atsam marai yawng hpe lang nna , tinang nga ai shara kaw e tai hpyen wa hpe gasat ga.Magrau grang ga. Anhte jinghpaw wunpawng amyusha mungchying mungshawa yawng kaw nga ai n-gun atsam yawng hpe lang nna,tinang mung hpe makawp maga ga.

Ndai majan hpe anhte amyu ni dang nan dang ra ai. Sum ai lam n- mai nga ai. Ndai majan hpe anhte amyu ni sum jang anhte amyu ni mat mat na re. Anhte a lamu ga ngu ai mung mat mat na re. Dai majaw,anhte amyu ni grin nga lu na matu, anhte a mungdan grin nga lu na matu anhte amyu ni yawng gaw, nga manga n-gun hpe lang nna n-dai majan hpe dang nan dang hkra gasat ra sai.

Karai kasang anhte hte rau tut rai nga ai.Anhte a`teng man jaw ai n-dai majan hpe anhte amyu ni awng padang lu nan lu na.

Shanglawt awng Padang lu la u ga.Jinghpaw wunpawng amyusha ni yawng, ngwipyaw hkamja nga u ga.

BawmWang Laraw (Ningbaw)
Jinghpaw Wunpawng Amyu Sha Hpung (KNO)
Jinghpaw Wunpawng Amyu Sha Kongsi (KNC)

Download Original PDF(Kachin, English) DOC

{linkr:bookmarks;size:small;text:nn;separator:+;badges:*}

American Gaw Myen Hpyen Asuya N-tsa Ading Tawk Tsun Bawngban Ai Ladat Hte Hkum Pat Shingdang Ai Ladat Hpe Lang Na Matu Daw Dan

Fri, 25 Sep 2009 11:47:42 +0100

American asuya hku nna myen hpyen asuya ntsa hta ading tawk tsun bawngban ai ladat hte hkrum pat shingdan ai ladat lahkawng yen hpe jai lang mat na nga nna American Maigan Kyithkai Hkring Mang Hillary Clinton tsun wa sai.

Hkrum pat shingdang ai ladat langai hte sha gaw Myen hpyen asuya galai na matu yak ai hpe bai mu wa ai majaw ading tawk tsun bawngban ai ladat hte matut nna hkrum pat shingdang ai ladat yen hpe lang na nga nna Clinton gaw shi htawn ni hpe tsun mat wa ai re.

Myen mung n-tsa hta lang mat na ladat ni hpe maram ngut sai nga nna Clinton tsun wa ai. Obama asuya ningnan lung wa ai shaloi gaw Myen mung n-tsa hta tawn da na ladat hpe bai maram yu nga ai wa, ya gaw ngut sai nga nna shana wa ai.

"Myen mung hte seng nna n-pawt yaw shada lam hpe gaw n galai shai ai” ngu nna Chinton gaw UN zuphpawng lung sa ai Maigan kyithkai hkring mang ni hpe tsun dan mat wa ai.

“Asuya hku nna kaja nan demokresi hkrang de galai shai na matu anhte ra sharawng ga ai, mung shawa ni a ra ahkyak ai lam hpe galaw ya ra ai, mung masa bawng masha ni hpe dat ya ra ai, ninghkap mung masa pati hte amyu bawng sang ni hte ahkyak da tsun jahta bawngban ra ai” nga nna Hillary Clinton tsun mat wa ai.
Anhte a ladat hta hkrum pat shingdang ai lam gaw ahkyak ai lam langai re hpe anhte kam ai, raitim dai hte sha gaw myen mung shawa a matu anhte myit mada da ai lam mahtai n-pru wa ai re.

Raitim, ading tawk tsun bawngban shaga ai lam gaw hkrum pat shingdang ai ladat hpe ninghkap ai ngu nna anhte mu mada ai lam gaw shut nga ai nga nna Clinton tsun mat wa ai. AFP

{linkr:bookmarks;size:small;text:nn;separator:+;badges:*}

Mali-Nmai Hka Madim Galaw Ai Asia World Company Bungli Dawm La Ai Lam Chye Lu

Tue, 22 Sep 2009 17:30:00 +0100

Mali-Nmai hka mazup hta e hka madim hpe galaw nga ai Asia World company gaw bungli dabang kaw na masha ni hpe dawm la sai lam chye lu ai.

Asia world company gaw bungli dawm la kau ai bat mi jan ram rai sai nga nna buga masha langai tsun dan wa ai.

Mali-Nmai hka mazup mayan hta Myen mung kaw na Asia World company hte Miwa asuya a China Power Investment Corperation (CPI) ni gaw wan n-gun 3600 MW lu jaw ai hka madim kaba hpe rau jawm galaw nga ma ai rai nga ai.

Ya na zawn hka madim galaw nga ai bungli dabang kaw na dawm la kau ai lam gaw Kokang simsa lam hpung hte Myen hpyen ni gap hkat wa ai zawn, Jinghpaw mung hta e mung byin wa na hpe hkrit tsang ai majaw rai na re nga nna buga masha wa tsun dan wa ai.

Jinghpaw mung hta Jarit Sin Dap(Border Guard Force) de hkrang galai shai ra ai hte seng nna KIO/KIA uhpung hte SPDC ni a lapran 7 lang hkrum shaga ai raitim ya du hkra myit hkrum lam n lu shi ai lam chye lu ga ai.

2007 ning kaw nna Myen hpyen asuya hte Miwa asuya ni gaw Mali-Nmai hka madim hpe hkrang shapraw let galaw sa wa ai rai nga ai.

Raitim, Miwa bungli galaw ai hpung ni gaw bungli dabang kaw naw nga nga ma ai lam chye lu ai.

{linkr:bookmarks;size:small;text:nn;separator:+;badges:*}

Myen hpyen asuya hte Ko Kant lapran manghkang a majaw KIO hken lajang ai lam galaw

Fri, 21 Aug 2009 15:42:26 +0100

19th Aug 2009

Jarit sin hpyendap de hkrang galai shai na hte seng nna myen hpyen asuya hte bawng ban ai lam yak nga ai ten Wunpawng Mungdan shanglawt hpyendap ginjaw hta galaw nga ai dap-up hpyen wunjat hpe jahkring kau nna, tinang hte seng ai kanu hpyen dap de bai sa dat sai nga nna Du Kaba Gun Maw kawn tsun wa ai.

Shata (6) na ai hpyen wunjat hpe shata mi hte sha jahkring kau nna August shata (15) ya shani tinang a dap de bai sa dat sai nga nna Du Kaba Gun Maw kaw na chye lu ai.
Ko Kant rawt malan ginra “Lauk Kai” hkan shimlam hte seng nna shiga kahtet nga ai hpe na yang, dap dung hkan dap up n nga ai sha, tawn da na nga yang n byin ging ai manghkang ni pru wa chye ai. Dai majaw dap up ni yawng hpe tinang a dap de lawan ai hku wa na matu ngu nna ndai hpyen wunjat hpe jau jau dawm kau ai re” nga nna tsun ai.

Laiwa sai August (8) ya shani gap hkat jahkring wuhpung langai rai nga ai Ko Kant hte myen hpyen asuya a hpyen dap lapran dingkren ai lam ni byin wa ai hpang ya na zawn daw dan dat ai re lam chye lu ai. Ko Kant wuhpung hte ni htep ai Sakhkung hka nu hkran maga Wunpawng Mungdan Shanglawt Hpyendap dap ba (4) nga ai, Ko Kant shara gaw hpyen masa hku nna ahkyak ai shara langai rai nga ai.

Ya yang aten hta myen hpyen asuya hte gap hkat jahkring laknak lang wuhpung ni lapran hpyen dap hkrang galai shai sa wa na hte seng nna dingkren ai masa rai taw sai hte bawsang laknak lang wuhpung shagu gaw tinang a lamu ga ginra ni hpe sadi maja nga ai re. Dai hta sha n-ga, gap hkat jahkring tawn ai wuhpung ni kaw na KIA wuhpung, MNDAA Ko Kant wuhpung ni hte Mong La wuhpung yawng hpawm (4) gaw myit hkrum ai lam la da sai lam chye lu ai.

Dai myit hkrum da ai myithkrum lamang hta wuhpung langai ngai myen hpyen ausya hte simsa lam la tawn ai hten mat yang ngam ai wuhpung ni mung maren re nga nna tsun ma ai.

Mying n tsun ai Ko Kant wuhpung na lit nga ai marai langai tsun ai hta ndai myit hkrum lam gaw wuhpung (4) chyu n rai ai sha, simsa lam la tawn ai lak nak lang wuhpung yawng myit hkrum ai lam re nga nna tsun dan wa ai. RFA

{linkr:bookmarks;size:small;text:nn;separator:+;badges:*}

American Lahta Tsang Rapdaw Salang Jim Webb Gaw Than Shwe Hte Aung San Suu Kyi Hpe Hkrum

Sun, 16 Aug 2009 06:49:35 +0100

August 15, 2009

American mungdan lahta tsang rapdaw salang (amat) “Jim Webb” gaw myen hpyen gumshen ningbaw Than Shwe hte ninghkap democracy ningbaw Aung San Suu Kyi yen hpe dai ni laban hpang kru shani hkrum mat wa ai lam chye lu ai.

Rapdaw salang Jim Webb gaw Than Shwe hte Naypyidaw kaw hkrum nna, Aung San Suu Kyi hte gaw Yangon mare kaba hta minute 45 na hkra hkrum shaga ai lam chye lu ai.
Jim Webb a daina de maga n’dau shapraw ai laika hta Myen hpyen asuya ni hku nna bungli shaja hte htawng 7 ning jahkrat dat ai american la John Yettaw hpe shalawt dat na matu mung myit hkrum lam lu la sai lam laika shapraw wa ma ai.

August 11 ya shani hta sha Myen tara rung kaw na gaw Aung San Suu Kyi hpe shata 18 n’ta kata kaw sha rawng nga na matu tara jeyang jahkrat dat nna, American la wa hpe gaw ruhka 3 hte htawng 7 ning jahkrat dat ma ai re.

“Ngai hpyi shawn ai ni kaw na ndai lam hpe jaw ai majaw myen asuya hpe chye ju dum ai” nga nna Jim Webb tsun mat wa ai. Aung San Suu Kyi hpe dat ya na matu mung hpyi shawn ai lam chye lu ai.

Jim Webb gaw American lahta tsang rapdaw a Sinpraw Asia, Pacific hte seng ai Lithkam Ningbaw rai nna, myen mung de sa du ai American rapdaw a shawng ningnan lang na dat kasa langai mi re. American asuya gaw myen mung de asuya masa lam hku nna tara shang n sa du ai, shi jan ning na mat wa sai lam chye lu ga ai. Jim Webb gaw Than Shwe hte lu hkrum ai nambat langai ngu na American asuya salang kaba langai mung rai nga ai.

“Yettaw hpe laban jahpawt myen mung kaw na tara shang shapraw dat na rai sai. Shi hpe Jim Webb hku nna hpyen nbung li hte kalang ta Bangkok de woi mat wa na re” nga nna ndau laika hta ka da ma ai.

Jim Webb gaw American Hka Dap hkringmang magam gun dingsa langai rai nna, Vietnam Majan hpyenla dingsa langai mung rai nga ai lam chye lu ai. Reuters

{linkr:bookmarks;size:small;text:nn;separator:+;badges:*}

Myenmung Hte Seng Nna Inida Asuya Tsun Shaga Sai

Thu, 13 Aug 2009 15:46:28 +0100

August 13, 2009

Myenmung a mungmasa manghkang hte seng nna aten law law zim nga ai Gala asuya gaw lagaw lahkam langai hku nna mungmasa lam galai shai ai lam hpe galaw sa wa na matu myen asuya hpe shadut dat sai.

Aung San Suu Kyi hpe shata 18 n’ta hta matut sharen da na matu ari jahkrat dat ai hpang Gala asuya a sharawng ai lam hpe maigan hkring mang dap kaw na ndau shana wa sai re.

“Myen asuya hku nna mungdan kata simsa lam hpe galaw na hte mungmasa myit jasat ni hpe lawan ai hku galai shai na matu ra nga ai hpe Gala asuya gaw madung da tsun shaga mayu ai. Ya yang na mabyin ni gaw Myen asuya a matu simsa lam hte ninghtang shai nga ai. Mung masa bawng masha ni hpe dat ya ai lam gaw simsa ai lam a matu ahkyak ai lam re” nga nna Maigan Hkring Mang Dap kaw na, tsun shaga ahkang nga ai wa gaw August 11 ya shani na Maigan Hkring Mang Dap Internet shiga hta tsun da ma ai.

Aung San Suu Kyi hpe aming rai n jahkrat shi ai shani hta myenmung lam hpe myit shang sha ai lahta tsang na amat ni, tara hte seng ai salang ni gaw India rapdaw zuphpawng ni hta myenmung n’tsa India asuya a policy hpe tang madun na matu tsun shaga ai lam ni galaw wa sai.

Myenmung hte seng nna jahta lai wa sai India lahta tsang rapdaw amat hte ginjaw tara rung tara kasa “Ram Jethmalani” gaw “India asuya gaw ndai hta sha n ga tang du ai hku grau grau galaw mai hkra anhte matut nna sadut ra na re, ya yang ten hta rapdaw hta myenmung hte seng ai ga baw ni hpe jahta wa masai, gara hku galaw na, hpa hpe galaw sa wa na ngu ai daw dan ai lam hpe gaw rai n hkrat wa shi ai” nga nna tsun ai.

Demokrisi n’gun kaba mungdan ni rai nga ai India hte American mungdan lahkawng sut masa, mung masa ni hpe arau jawm galaw nga ai aten ladaw hta India asuya hku nna Demokrisi hpe grau nna n’gun jaw galaw ging ai nga nna matut tsun ai.

Aung San Suu Kyi hpe tara rung kawn aming jahkrat ai hte seng nna shi gaw “myenmung asuya a galaw ai ladat gaw 1996 ning shinggyim ahkaw ahkang upadi hte mung n htan shai ai, 1948 Mungkan Wunpawng Hpung a shinggyim ahkaw ahkang ndau laika hte mung n htan shai ai, ngai hku nna Noble kumhpa shagrau da hkrum ai Aung San Suu Kyi a matu matsan dum ai, shi hpe ya na zawn galaw ai gaw kachyi mi mung lachyum n nga ai re” nga nna tsun wa ai.

India asuya gaw myen asuya hpe shadut tsun nga ai aten hta India du myenmung demokrisi wuhpung n’gun 100 jan mung New Delhi, myenmung hkring mang rung shawng hte Jan Ta Man Tal nampan sun shawng hta Aung San Suu Kyi hpe tara je yang ai hte seng nna ninghkap n gun madun ai lam ni mung galaw wa sai.

Ninghkap n’gun madun ai ni gaw myenmung hkring mang rung a wutdek wang n hpan hte chyinghka hkan e Aung San Suu Kyi sumla ni shakap nna “Free Aung San Suu Kyi” ngu ai laika ni hpe mung tsi hte mahkret ka nna n’gun madun ma ai.

Myenmung hkring mang rung shawng de wunhpung 2 garan nna n’gun madun sa wa ai hta rim ai lam n nga ai rai tim Inida pyada ni gaw masha n’gun marai 60 hpe htaw sa wa ai mawdaw zaw hpe zing da ya ai majaw n’gun madun ai ni n wa ai sha matut n’gun madun na matu shajin wa ai ten hta she mawdaw zaw hpe bai jaw nna wa na ahkang jaw ai. Myenmung hkring mang rung na lit nga ai ni gaw rung wang kata kaw nna sumla ni dem la ma ai lam chye lu ai.

Miwa mungdan asuya hku nna gaw myen hpyen ni a tara daw dan ai lam hpe hkungga jaw ra ai nga nna ndau shabra laika shapraw wa ma ai re.

{linkr:bookmarks;size:small;text:nn;separator:+;badges:*}

Hpri Sadek Kata Kaw Numsha Langai Si Rawng Nga Ai Hpe Myitkyina, Dapkawng (laksan) Htawng Makau E Muhkrup

Mon, 10 Aug 2009 04:09:03 +0100

Lai wa sai August praw 7 ya shani Myitkyina mare kaba, Dapkawng (laksan) htawng makau hta e, hpri sadek langai kaw asak 20 ning jan numsha langai si rawng taw ai hpe mu la wa ai nga nna Myitkyina buga shiga lawk kaw nna chye lu ai.

Dapkawng (laksan) htawng makau hta hpri sadek langai kaw na grai manam wa ai majaw buga masha ni n tsen nna hpaw dat yu yang numsha langai si rawng taw ai hpe buga masha ni mu wa ai.

Hpri sadek kaw si rawng taw nga ai num sha gaw Jinghpaw numsha re ai lam, dai sadek hpe buga masha ni kadai mung n chye ai hku sha, Dapkawng (laksan) htawng makau kaw sa kabai tawn da ai re nga nna buga masha langai tsun dan wa ai.

Buga masha langai tun ai hta “Ndai hpri sadek hpe Shatapru maga de na htaw yu wa ai hpe gaw mu hkrup dat ai, rai tim masha kadai ni htaw yu wa ai re hpe gaw atsawm n matsing sai” nga nna buga masha langai tsun wa ai.

Hpri sadek kata kaw na numsha a mang hpe ya ten hta gara n’ta kaw na, kadai kasha re hpe rai nchye shi ai lam chye lu ai.

Si rawng taw ai numsha gaw hkum kata maga de elastic palawng hpun da nna, n tsa kaw gaw jeans palawng kahtap jahpun da n’htawm Jinghpaw labu bu da let, miman hpe gaw plastic hte magap da ya ai hpe mung chye lu ai. Myiman ni yawng hten taw sai majaw kadai kasha re hpe atsawm n lu maram ma ai nga nna buga masha langai tsun dan wa ai.

Numsha a moi mang hpe August 7 ya shani nan, ga lajang jep yu ai lam hpe galaw ma ai lam chye lu ai.

Numsha a mang hpe ga jep yu yang, numsha a numhkrang hta roi rip hkrum ai kumla ni hpe mu lu ai lam, ga lajang ai hta lit ang ai tsi magam gun langai kawn lakap let chye lu ai.

Moi mang hpe August 8 shani makoi mayang ngut sai lam buga masha lagnai matut tsun dan wa ai.

Ya ten du hkra roi rip hkrum let n nga mat ai numsha gaw kadai kasha re hpe chye lu na matu matut nna sagawn nga ma ai lam chye lu ga ai. Roi rip sat ai kadai ni re hpe n chye lu tim seng ang ai ni kawn sagawn nga sai lam buga shiga lawk kawn chye lu ai.

Jinghpaw mung hta e numsha ni roi rip hkum ai gaw lani hte lani grau grau law htam wa nga sai nga nna buga masha ni lapran hta tsun kajai nga ma ai lam chye lu ai.

{linkr:bookmarks;size:small;text:nn;separator:+;badges:*}